Украина Президенти Владимир Зеленский «Украина халқаро авиалиниялари» самолёти Эронда уриб туширилгани ҳақидаги тахминлар инкор этилмаётгани, аммо ҳозирча ўз исботини топмагани»ни билдирди. Бу ҳақда Meduza хабар бермоқда.
«ОАВларда давлат раҳбарларининг сўнгги баёнотларини ҳисобга олган ҳолда барча халқаро шерикларни, биринчи навбатда, АҚШ, Канада ва Буюк Британия ҳукуматларини ҳалокатга оид маълумот ва далилларни тергов комиссиясига тақдим этишга чақирамиз», — деб ёзган Зеленский ўзининг Facebook’ида.
«Мақсадимиз — сўзсиз ҳақиқатни аниқлашдир», — деб таъкидлаган Украина президенти.
Мавзуга доир: Эрон Украина самолётининг ракета билан уриб туширилгани ҳақидаги маълумотни «психологик уруш» деб ҳисоблайди
Америка ОАВ, жумладан, CNN манбалари самолётнинг қулашига ракета учиришдаги хато ҳам сабаб бўлиши мумкинлиги ҳақида хабар тарқатган. Иорданиянинг «Al-Hadath» нашри самолёт тасодифан Эрон ракетаси билан уриб туширилган бўлиши мумкин, деб ёзганди. Эрон ҳукумати эса двигателдаги алангаланиш ҳалокатга сабаб бўлганини маълум қилди.
Кейинроқ Канада бош вазири Украина самолётини Эрон ракетаси уриб туширганини маълум қилган. Буюк Британия бош вазири Борис Жонсон ҳам канадалик ҳамкасбининг фикрини қўллаб-қувватлаб чиқди — унинг айтишича, Британияда самолёт Эрон ракетаси билан уриб туширилганини тасдиқловчи далиллар бор.
Изоҳ (0)