Хоразм вилояти Боғот туманининг Қипчоқ қишлоғида яшовчи 21 ёшли Ёқуббой Дўсметов сувга чўкаётган аёлнинг ҳаётини қутқариб қолди, деб ёзмоқда «Xabar.uz» нашри.
«Акам билан «газ заправка»га кетаётган эдик. Бизга қарама-қарши йўналишда келаётган машина ҳайдовчиси «Анави кўприкда бир қиз ўзини сувга ташламоқчи бўлиб турибди», деб қичқирди. Биз ўша томонга шошилдик. Етиб борганимиз заҳоти ёшгина аёл ўзини Полвонёп каналига отди...», — дейди йигит.
Эни салкам 70 метр бўлган канал суви шитоб билан оқарди. Йўл-йўлакай кийимларини ечганча каналнинг қуйироқ қисмига югуриб борган Ёқуббой ўзини сувга ташлайди. Каналнинг ўртароғига сузиб боргунича аёл гоҳ чўкиб, гоҳ сув юзига қалқиб чиқарди. Йигит унинг кийимидан маҳкам ушлаганча қирғоққа базўр олиб чиқади...
Сўнг дарҳол энг яқин хонадонга олиб борилади. Хонадон эгалари шоша-пишганча аёлга бирламчи ёрдам кўрсатишга киришади...
Хонадон соҳибаси қизлари билан биргаликда аёлга ёрдам кўрсатиб, иссиқ чой ичиради ва қалин кўрпага ўраб қўяди. Аёл сал ўтмай ўзига келади ва ҳўнграб йиғлаб юборади...
Аниқланишича, ўзини сувга ташлаган аёл Ҳазорасп тумани Бўстон қишлоғида яшовчи 23 ёшли Н.Н. бўлиб, маҳалла фаолларидан бирининг келини экан. Яқинда кўзи ёриган ёш келинчак оилавий жанжаллар туфайли қаттиқ тушкунликка тушган ва...
Бугунги кунда Н.Н Боғотда, ўзи туғилиб ўсган ота-онасининг уйида даволанмоқда. Воқеа юзасидан ҳуқуқни муҳофаза қилувчи идораларнинг хабари бор ёки йўқлиги маълум эмас.
«Қиш фасли қирчиллаб ўтадиган Хоразмда январь ойида сувга сакраб, чўкаётган одамни қутқариш учун кишининг виждони соф ва иймони кучли бўлиши керак. Ёқуббойга ҳам осон бўлгани йўқ. У бу халоскорлигидан сўнг иситмалаб бир неча кун ётиб қолди. Лекин у қилган савоб ишидан мамнун, — дейди халоскор йигитнинг қўшниси Дилбар Олимова.
Аввал Қорақалпоғистонда 2019 йил декабрь ойида 7 ёшли болани сувдан олиб чиққан мактаб ўқувчисининг мукофотлангани ҳақида хабар берилган.
Изоҳ (0)