Тошкент шаҳар Чилонзор тумани маъмурий суди Ўзбекистон Либерал-демократик партиясидан туман кенгаши депутатлигига номзод бўлган Фазлиддин Баҳромовнинг аризасига кўра, туман сайлов комиссияси қарорини ҳақиқий эмас деб топди. Бу ҳақда «Gazeta.uz» хабар берган.
6 январь куни Фазлиддин Баҳромов судга туман сайлов комиссиясининг 2019 йил 22 декабрда чиқарган 19-сонли қарорни бекор қилишни сўраб мурожаат қилган. Номзоднинг сўзларига кўра Лутфий 4 сайлов округи баённомаси сохталаштирилган. У Халқ демократик партиясидан номзод бўлган рақибининг овозлари сунъий равишда кўпайтирилгани ва бошқа номзодларнинг имконияти пасайтирилганини таъкидлаган, шунингдек, бир нечта шундай баённомага ҳамда уларнинг рангли нусхаларига эгалигини билдирган.
Бундан ташқари, номзод Сайлов кодексига риоя қилмаслик ҳолатлари кузатилганини қайд этиб, суддан 631-участкада қайд этилган натижаларни бекор қилишни сўраган. Баҳромов участка комиссияси раиси, раис ўринбосари ва участка комиссияси котиби Республика олимпия захиралари коллежи ходимлари экани, ХДПдан кўрсатилган номзод Аброр Мамадалиев эса ушбу ўқув муассасасида директор ўринбосари экани ва уларга бевосита раҳбарлик қилиши шубҳали эканини таъкидлаган. Якунда ХДП номзодининг ғалабасини таъминлаган асосий омил ҳам ушбу шахсларнинг шубҳали ҳаракатлари бўлган.
Аввал 4-сайлов комиссияси округи раиси ўзи овозларни ҳисоблаш жараёнида иштирок этмаганини билдириб, якунда тайёр баённомага имзо қўйганини тан олганди.
Иккита баённомаИккинчи суд мажлисига Чилонзор тумани сайлов комиссияси раиси Нодира Мусева 4-сайлов округининг 4 та 548, 549, 550 ҳамда 631-сайлов участкаларидаги баённомаларнинг асил нусхасини олиб келган.
Кузатувчиларнинг баённома нусхаси ва 4-округ 548-сайлов участкаси комиссиясининг баённомалари бир биридан фарқ қилади.
Баённомалар нухсалари солиштирилганда, кузатувчилар овоз бериш якунланганидан кейин тузилган «протокол»ларнинг сайлов комиссияси тузган баённомалардан фарқли экани маълум бўлди. Бундан ташқари, рангли чиқарилган оригинал баённомаларда ва дастлаб тақдим этилган баённомаларда аъзоларнинг изоҳлари турлича.
Судья ҳақиқий баённомани аниқлаш мақсадида сайлов комиссияси раисларини мажлислар залига чақиртирди.
549-сайлов участкаси раиси Шуҳрат Баҳодиров баённоманинг бир марта, овоз бериш жараёнлари якунига етганидан кейин имзоланиши ва сайлов округи комиссиясига юборилишини қайд этди. У нима учун сайлов участкасида иккита баённома расмийлаштирилгани ва улардаги рақамлар нима сабабда турлича эканига изоҳ бера олмади. Буни устига, участка раиси нима сабабдан иккала баённомага ҳам имзо чекганини тушунтира олмади, лекин рангли чиқарилган баённомага имзо қўймаганлигини билдирди.
Шуҳрат Баҳодиров ҳам сайлов округи комиссиясига юборилган баённомани бекор қилиш ҳақидаги далолатнома расмийлаштирилмаганини айтди. У номзодлар орасида бундай катта фарқ кузатилиши ҳақиқатга зид эканини билдирди.
631-сайлов участкаси раиси Шоира Абдуллаева сайловлар бўлиб ўтган куни англашилмовчилик туфайли маҳалла фуқароларининг маълум қисми бошқа округда овоз берганини маълум қилди. Оқибатда нотўғри тўлдирилган биринчи баённомадан кейинги иккинчи ҳужжат тўлдирилган ва унга 300 нафардан ортиқ сайловчиларнинг овозлари қўшилган. У маълумотларни текширмасдан баённомага имзо қўйганини тан олди.
Суд раиси Абдулла Муҳиддинов сайловчилар сони ортганида номзодларнинг ҳам овозлари камаймаслиги балки аксинча кўпайиши лозимлигини таъкидлади.
Участка комиссияси раҳбари ХДП партияси номзоди Аброр Мамадалиевнинг ишончли вакили сифатида сайловларда иштирок этганига изоҳ бериб, ушбу ҳаракат Сайлов кодексига зид эканини билмаганлигини қайд этди.
«Номзод билан учрашувларга кўплаб рус аёллар келди. Номзод рус тилида гапиришга қийналишини айтиб, мендан улар билан мулоқот қилишда ёрдам сўради. Мен номзод ўрнига чиқиш қилдим», — дейди аёл.
550-сайлов участкаси раиси ўринбосари Дониёр Исхоқов Шаҳар онкологик диспансеридаги сайловлар ёпиқ тарзда беморлар ўртасида ўтиб, соат 11:30 да овоз бериш якунланганини маълум қилди. У битта баённома расмийлаштирилиб, сайлов округи комиссиясига юборилганини билдирди ва судга турли рақамлар акс этган иккита баённома қаердан келиб қолганини тушунтира олмади.
Чилонзор тумани прокурори ёрдамчиси Шуҳрат Ўткиров баённомаларнинг сохталаштирилган бўлиши мумкинлигини таъкидлаб, суд раисидан кейинчалик жиноий иш очиш учун ушбу далилларни инобатга олишни сўради.
Чоршанбада бўлиб ўтган учинчи суд мажлисида 548-сайлов участкаси раиси Қаҳрамон Воҳидов сўроқ қилинди. У ҳам нима сабабдан икки хил баённома пайдо бўлиб қолганига изоҳ бера олмади. Лекин кузатувчилар томонидан тузилган баённома нусхасининг ҳақиқийлигини тан олди. Участка раҳбари рангли баённомага имзо чекмаганини айтиб, ҳужжатнинг «устаси-фарангларча» расмийлаштирилганини қайд этди.
Қаҳрамон Воҳидов ўз сайлов участкасида ҳаммаси ҳалол ва холис ўтганини гапириб, иккита баённоманинг қандай қилиб бир вақтда расмийлаштирилганинин яхши тушунмаганлигини айтди.
«Соат 6:00 дан 3:00 гача ишладим. Кун бўйи югур-югур, уйма-уй юрдик, одамларни сайловларда иштирок этишга чорладик. Меҳнатимиз бесамар кетганидан афсусдаман», — деган Воҳидов.
Эклогик партия номзоди Одамбой Юсупов «содир бўлган адолатсизлик ҳақида эшитгани, лекин ҳақиқат учун курашишни» истамаганини сўзлади.
«Бу менга керак эмас. Энг муҳими – мени безовта қилманг. Адолат вақти келганда қарор топади. Ҳозир уни талаб қилишдан наф йўқ», — деган «яшиллар» вакили.
Томонларнинг даъвоси эшитилганда Фазлиддин Баҳромов 4-сайлов округида Сайлов кодексинигн 25, 43, 94, 95 ва 96-моддаси талаблари қўпол равишда бузилганини иддао қилди.
«Депутатликка номзодлар Азизов ва Мамадалиевлар ўз кўрсатмаларида халқ вакили бўлиб, катта ҳажмдаги ишни бажаришга тайёр эмасликларини айтганини эшитдик. Мен 28 ёшдаман, тадбиркорман ва олий маълумотга эгаман. Ватанимиз равнақига ўз ҳиссамни қўшмоқчиман, халқимизга ёрдам бериб, турмуш шароитларини яхшиламоқчиман» – деган Баҳромов.
Cуҳасткалар раислари номзоднинг ушбу сўзларига жавоб қайтармаган ҳолда, суддан қонуний қарор чиқаришни сўради. Участка раҳбарларининг айримлари сайловларга қайтадан жалб қилишларини истамаслигини очиқ айтиб ўтди.
Прокурор ёрдамчиси Шуҳрат Ўткиров суддан ишни қайтариш, прокуратурага ҳолат юзасидан жиноий иш очиш учун юборишни сўради.
Суд раиси Абдулла Муҳиддинов Чилонзор томани сайлов комиссиясининг қарорини ҳақиқий эмас деб топди, комиссия зиммасига сайловларни қайтадан ўтказишни юклаб, прокуратурага ишга ҳуқуқий баҳо бериб, жиноят аломатлари кузатилсе тегишли тартибда жиноий жавобгарлик масалаларини кўриб чиқишга қарор қилди.
Судья 631-сайлов участкаси комиссия раисидан Республика олимпия захиралари коллежи вакилларини жараёнга жалб қилмасликни сўради.
Изоҳ (0)