Ўзбекистонда 2019 йил давомида инфляция динамикаси турли йўналишда ўзгарди. Биринчи ярим йилликда инфляция динамикаси пасайиб, йиллик 13—13,5 фоиз даражасида мустаҳкамланди, иккинчи ярим йилликда эса динамика ўсди. Бу ҳақда Марказий банк хабар берди.
2019 йил учун прогноз кўрсаткичлари 13,5 — 15,5 фоиз даражасида белгиланган эди. Йил якунига кўра унинг кўрсаткичи 15,2 фоизни ташкил этди.
Қайд этилишича, иккинчи ярим йилликда инфляциянинг нисбатан юқори даражада бўлишига тартибга солинадиган нархларнинг эркинлаштирилиши ҳамда банкларнинг юқори кредит фаоллиги ва давлат харажатларининг ошиши билан мустаҳкамланган ва инвестицион ва истеъмол талабини оширган омиллар сабаб бўлган.
Тартибга солинадиган нархларнинг ошиши билан бирга, июль—август ойларида девалвациянинг тезлашиши 2019 йилнинг август ойида инфляциянинг ойлик кўрсаткичи ошишида асосий омил бўлиб хизмат қилди ва у 2,9 фоизни ташкил этиб, 2018 йилнинг мос даврига нисбатан 0,3 фоизга юқори бўлди.
2019 йилнинг 4-чорагида инфляция ўсиш даражаси 2018 йилнинг мос даврига нисбатан 0,7 фоизга секинлашган.
2019 йил давомида йиллик инфляцияга ун ва нон маҳсулотлари нархининг ошиши инфляцион босим кўрсатган.
2019 йилда тартибга солинадиган нархлар ўртача 21.6 фоизга ўсган, хусусан, қолипли ноннинг нархи 40 фоизга, газ нархи 18,8 фоизга ошган бўлса, электр энергияси 18 фоизга ва бензин 17,6 фоизга қимматлашган.
Об-ҳаво ва иқлим шароитлари мева-сабзавот маҳсулотларининг нархида ўз аксини топди. Хусусан, меваларнинг нархи 21,4 фоизга қимматлашди, картошканинг нархи 11,7 фоизга, гуручнинг нархи эса 5,8 фоизга ошди. Бундан ташқари, озуқа базасининг етишмаслиги гўшт маҳсулотларининг нархида ўз аксини топди ва нархларнинг 23,4 фоизга ўсишига сабаб бўлди
Шу билан бир вақтда, хизматлар соҳасида ҳам нархларнинг ўсиши кузатилди, хусусан йўловчи транспорти хизматлари тарифлари 13 фоизга, таълим эса 22 фоизга қимматлашди.
Марказий банк хабарида қайд этилишича, 2020 йилда инфляцияни таргетлаш режимига босқичма-босқич ўтиш инфляцияни 2021 йилда бир хонали сонга ва 2023 йилда 5 фоизга тушириш бўйича қатъий чора-тадбирлар қабул қилишни кўзда тутади.
Солиқ-бюджет сиёсатида умумий фискал баланснинг дефицитини камайтириш мақсад қилинган. Хусусан, умумий фискал баланс дефицити 2019 йилдаги 4 фоиздан 2020 йилда 2,7 фоизга қисқаради, 2022 йилда эса унинг 1,5 фоизга тушиши кутилмоқда.
Изоҳ (0)