Шимоли-ғарбий ҳарбий округ қўшинлари қўмондонлиги ташаббуси билан Қорақалпоғистон Республикасининг энг олис овулларида ҳам ватанпарварлик ойлиги доирасидаги тадбирлар ўтказиб келинмоқда. Бу ҳақда «Дарё»га округ матбуот хизмати маълум қилди.
Ҳарбий округ ватанпарварлик карвонининг навбатдаги манзили Мўйноқ тумани бўлди. Эрта тонгдан Нукус шаҳридан сафарга отланган ҳарбий хизматчилар аҳолига хуш кайфият улашиш, умумхалқ байрамига айланган Ватан ҳимоячилари куни шукуҳини тарқатишни мақсад қилди.
Биринчи манзил Мўйноқ туманига қарашли энг узоқ жойлашган ҳудудлардан бири — Бўзатов овул фуқаролар йиғинига қарашли «Қипчоқдарё» овулида жойлашган 10-сонли умумтаълим мактабида бўлди. Маҳаллий аҳолининг сўзларига қараганда бу овулда биринчи марта ҳарбий ватанпарварлик карвони меҳмон бўлмоқда. Кўзларида қувонч билан ҳарбийларни қарши олаётган отахон ва онахонлар, ҳарбий акаларига бўлган қизиқишларини ёшира олмаётган болажонлар меҳмонларни пешвоз кутиб олди.
Округ қўшинлари қўмондонининг ўринбосари, подполковник Нуриддин Қодиров, туман ҳокими Ерполат Еденбаев ҳамда «Нуроний» жамғармаси Мўйноқ тумани бўлими раиси Жанабай Жусимов сўзга чиқиб, ёшларни ватанпарварлик руҳида тарбиялаш, уларнинг бандлигини таъминлаш ҳамда аҳоли ўртасида соғлом турмуш тарзини тарғиб этишга қаратилган мана шундай тадбирларнинг аҳамияти ҳақида тўхталиб ўтди. Туман ҳокими томонидан ушбу овулга ватанпарварлик карвони биринчи марта келгани, мана шундай тадбирларни келгусида кўпроқ ташкил этилиши зарур эканлиги таъкидланди.
Навбатдаги манзил Мўйноқ шаҳаридаги деҳқон бозори бўлди. Уй-рўзғорни ўйлаб, бозорлик қилиб юрган юртдошларн ҳарбий оркестр садоларини ўзгача қувонч билан қарши олди.
Кейинги икки манзилда Фавқулодда вазиятлар вазирлиги бўлинмалари томонидан Орол денгизи тубидаги суви қуриган ҳудудларда «яшил қопламалар» — ҳимоя ўрмонзорлари барпо этиш ҳамда Мўйноқ туманидаги ободонлаштириш ишларида жонбозлик кўрсатаётган ҳарбий хизматчилар жойлашган ҳудудларда ҳам ватанпарварлик карвони томонидан «Мардлик ва жасорат» дарслари, концерт дастури ва кўргазмали чиқишлар намойиш этилди.
Изоҳ (0)