Ўзбекистон Ташқи ишлар вазирлиги Яқин Шарқ минтақасида юзага келган кескин вазият юзасидан баёнот берди.
Вазирлик томонидан маълум қилинишича, Ўзбекистонда Марказий Осиёга бевосита туташ Яқин Шарқда юз бераётган воқеалар алоҳида ташвиш билан қарши олинмоқда.
Баёнотда айтилишича, ҳарбий-сиёсий ҳолатнинг янада кескинлашиши кўплаб инсонлар қурбон бўлишига ва кенг кўламли гуманитар фалокатга олиб келиши мумкин, ҳаётий муҳим иқтисодий алоқалар ва коммуникация йўлларини вайрон қилади, минтақавий ва глобал хавфсизликка тузатиб бўлмас зарар етказади.
Ўзбекистон томони ўта босиқлик тарафдори бўлиб, тарангликни камайтириш ва минтақадаги вазиятни мўътадиллаштириш учун қарама қарши томонларни сиёсий-дипломатик чоралар кўришга чақиради, дейилади баёнотда.
Эслатиб ўтамиз, АҚШ томонидан Эроннинг энг нуфузли генерали Қосим Сулаймонийнинг ўлдирилиши Яқин Шарқ минтақасида кескинликни юзага келтирди. Эрон бунга жавобан 8 январга ўтар кечаси АҚШнинг Ироқдаги иккита ҳарбий базасига ракета зарбалари берди ҳамда буни ўз-ўзини ҳимоя қилиш деб атади. АҚШ президенти Дональд Трамп Эроннинг зарбаларига муносабат билдириб, мазкур минтақада янги уруш бўлмаслигини маълум қилди.
Мавзуга доир:
- Уруш бўлмайди. Трамп Эроннинг зарбаларига муносабат билдирди
- Украина самолётининг Теҳрондаги ҳалокати. Эроннинг Ироқдаги АҚШ базаларига зарбаси. Асосий маълумотлар
- «Трампга сайлов олдидан АҚШга юбориладиган тобутлар керак эмас». Шарқшунослар ва сиёсатшунослар — Яқин Шарқдаги янги низо ҳақида
- «Одамлар ғазабда, лекин урушга қарши». Эронда тинчлик ва хотиржамлик. Маҳаллий аҳоли монологлари
Изоҳ (0)