Ўзбекистонда молиялаштириш манбаси аниқ бўлмаган объектларда қурилишни бошлаш ва лойиҳа-смета ҳужжатларисиз қурилишни молиялаштириш тақиқланади. Бу ҳақда Ўзбекистон Президенти Шавкат Мирзиёев бошчилигда 8 январь куни ўтказилган видеоселекторда маълум қилинди.
«Бугунги топшириқлар ижросини самарали ташкил этиш иқтисодий комплексдан катта масъулият талаб этади. Шу боис бу йил ҳукумат ва ҳудудлар учун «иқтисодий комплексни сафарбар қилиш йили» бўлади», — деди Шавкат Мирзиёев.
Йиғилишда Давлат бюджети параметрларини ижро этиш ва ҳудудларда тадбиркорликни ривожлантириш бўйича жорий йилги устувор вазифалар муҳокама қилинди.
Шунингдек, видеоселекторда тадбиркорликни ривожлантириш бўйича устувор вазифалар белгилаб берилди. Бундан ташқари, янги Солиқ кодексининг мазмун-моҳиятини кенг тарғиб қилиш масаласи ҳам кўриб чиқилди.
Навоий ва Олмалиқ кон-металлургия комбинатлари, «Ўзбекнефтгаз», «Ўзтрансгаз», «Ўзқурилишматериаллари», «Ўзкимёсаноат» каби йирик корхоналардан солиқ йиғиш ишлари билан Йирик солиқ тўловчилар билан ишлаш инспекцияси шуғулланиши қайд этилди.
Видеоселекторда соҳа ва тармоқлар раҳбарлари, ҳокимлар белгиланган прогноз режаларни бажариш, тадбиркорликни ривожлантириш масалалари юзасидан ҳисобот берди.
Изоҳ (0)