Россияда ноябрь ойи ўрталаридан буён энг кам — бир суткада 23 351 та COVID-19 ҳолати қайд этилди. Санкт-Петербург илк бор кунлик касалланишлар бўйича Москвадан ўзиб кетди

Россияда бир суткада 23 351 та коронавирусга чалиниш ҳолати қайд этилди, деб хабар бермоқда Meduza вирус тарқалишига қарши курашиш тезкор штабига таяниб.

Янги касалланиш ҳолатларининг энг кўпи Санкт-Петербург (3 657), Москва (3 591) шаҳарлари ҳамда Москва вилоятида (1250) аниқланган. Шу кунгача мамлакатда кунлик касалланганлар сони бўйича Москва етакчилик қилиб келаётганди.

Пандемия бошланганидан бери жами 3 260 138 киши касалланган.

Тезкор штаб маълумотларига кўра, сўнгги суткада COVID-19’дан 482 киши вафот этган, қурбонларнинг умумий сони 58 988 нафарга етган.

Янги аниқланган касалланиш ҳолатлари сони 18 ноябрдан бери илк бор кам бўлди. Ўшанда 20 985 кишида вирус аниқланганди. Россияда бутун декабрь давомида ҳар куни 26 мингдан 29 мингтагача ҳолатлар қайд этилган. Рекорд кўрсаткич 24 декабрда кузатилган бўлиб, 29 935 кишида COVID-19 аниқланган.

Эслатиб ўтамиз, декабрь ойидан Россиянинг барча ҳудудларида коронавирусга қарши эмлаш бошланди. «Роспотребнадзор» раҳбари Анна Попова Россияда COVID-19 пандемияси баҳорда тугашини тахмин қилган.

Россиялик инфекционист Евгений Тимаков январь ойининг илк ҳафталарида мамлакатда коронавирусга чалиниш ҳолатлари кўпайиши кутилаётганини билдирган.