2019 йилда Норвегия пойтахти Ослода ўлим билан якунланган битта йўл-транспорт ҳодисаси содир бўлган. Машина панжарага урилиши оқибатида ҳайдовчи ҳалок бўлган, деб хабар беради TJournal.
Шу билан бирга йил давомида пиёдалар ёки велосипедлар иштирокида бирорта ҳам ЙТҲ содир бўлмаган.
Норвегия ўтган йил давомида мамлакат йўлларида бирорта ҳам болалар ўлими қайд этилмагани билан ажратиб туради.
Сўнгги ўн йиллик ичида ўлим даражаси нафақат пойтахтликлар, балки бутун мамлакат учун камайган: 1970 йилда 560 киши ҳалок бўлган, уларнинг 101 нафари болалар. 1985 йилда эса 482 киши, 2019 йилда эса 110 киши ЙТҲ қурбони бўлган. 1975 йилда Осло йўлларида 41 киши ҳалок бўлган.
Вазиятнинг яхшиланишига шаҳар ичида тезликнинг сезиларли даражада камайтирилгани ва Ослонинг марказий туманларида автомобиль йўлларининг қисқартирилгани, шунингдек, сифатли йўл қопламалари ва замонавий жиҳозланган автомобиллар сабаб бўлган. Бундан ташқари Норвегияда велосипедлар жуда ҳам оммалашган.
Ўзбекистон Ички ишлар вазирлигининг маълумотларига кўра, 2018 йилда мамлакатда содир бўлган йўл-транспорт ҳодисалари оқибатида 2262 киши ҳалок бўлган. 2019 йилги маълумотлар ҳали ошкор этилмади.
Изоҳ (0)