27 декабрь, жума куни Туркиянинг Истанбул шаҳри яқинидаги Габза туманида мамлакатнинг илк миллий автомобили тақдимоти ўтказилди, деб хабар берди ТRT.
Автомобиль тақдимотида президент Ражаб Тоййиб Эрдўғоннинг шахсан ўзи иштирок этди. Тақдимотдан сўнг Эрдўғон биринчи турк автомобили рулига ўтириб, уни синаб кўрди.
Туркиянинг илк миллий модели ўрта ўлчамли электрокроссовер бўлиб, у TOGG маркаси остида ишлаб чиқарилади. Кейинроқ марканинг седан, хетчбек, компактвен ва Б-сегментдаги кроссовери ҳам пайдо бўлади. Тадбир давомида седан консепти ҳам намойиш қилинган.
TOGG (Türkiye‘nin Otomobili Girişim Grubu, Турк автомобиль ташаббускор гуруҳи) маркаси 5 та турк компанияси — Anadolu Grubu, BMC, Kök Grubu, Turkcell ва Зорлу Zorlu Holding’нинг биргаликдаги ташаббуси ҳисобланади.
Компания раҳбари Рифат Хисаржиклиўғлунинг маълум қилишича, 2021 йилда завод қурилиши якунланади ва унда 2022 йилдан бошлаб 5 та моделдаги автомобиллар ишлаб чиқарилади. Заводнинг йиллик ишлаб чиқариш қуввати 175 минг дона машинани ташкил қилади. Компания тўлиқ хусусий ҳисобланади, бироқ ҳукумат уни 2035 йилгача солиқ имтиёзлари, бепул ер ижараси ва 30 минг дона машина сотиб олиш мажбурияти билан қўллаб-қувватлайди.
Завод лойиҳаси 22 миллиард турк лирасини (3,7 миллиард доллар) ташкил қилади. У ишга туширилгач 2-3 йилдан кейин жаҳон бозорига чиқиши режалаштирилган.
https://www.instagram.com/p/B6k_Z0mH9ay/
Изоҳ (0)