Наманган вилояти ҳокими Хайрулло Бозоров Наманган шаҳридаги «Шодиёна» мажмуасида бўлиб ўтган йил якунларига бағишланган байрам тадбирида спортчилар, маданият ва санъат вакиллари, журналист ва блогерларни тақдирлади. Бу ҳақда «Дарё» мухбири Азизбек Абдувалиев хабар бермоқда.
Вилоят спортчилари томонидан жорий йил мобайнида маҳаллий ва халқаро миқёсидаги мусобақаларда 1009 та олтин, 951 та кумуш, 1512 та бронза, жами 3472 та медаль қўлга киритилди.
Наманганлик спортчиларнинг Токио олимпиадасида муваффақиятли иштирокини таъминлаш — мутасаддилар ўз олдига қўйган асосий мақсадлардан бири. Улардан 5 нафари ушбу Олимпиада лицензияларини қўлга киритиб улгурди. Ҳозирда яна 12 нафар спортчи йўлланмалар учун курашни давом эттирмоқда.
Тадбирда вилоятда жисмоний тарбия ва спортни оммалаштиришга ҳамда республика ва халқаро миқёсдаги мусобақаларда эришган юқори натижалари учун 50 нафардан ортиқ спортчига вилоят ҳокимининг ташаккурномаси ҳамда совғалари топширилди.
Жумладан, юнон-рум кураши бўйича жаҳон чемпионати совриндори, Токио—2020 Олимпиадаси йўлланмаси соҳиби Рустам Ассакаловга Malibu автомобили, мураббийи Равшан Рузуковга Gentra автомобили, каратэ WKF бўйича Осиё чемпиони, Токио—2020 йўлланмаси даъвогари Баҳринисо Бабаевага Spark автомобили совға қилинди.
Байдарка ва каноэда эшкак эшиш бўйича Осиё чемпионлари, Осиё ўйинлари ғолиблари, жаҳон чемпионати совриндорлари Нилуфар Зокирова ва Дилноза Раҳматовага Наманган шаҳридан хонадон ажратиш сертификатлари топширилди.
Алишер Навоий номидаги вилоят мусиқали драма театри жамоаси сентябрь ойида Қирғизистоннинг Ўш шаҳрида ўтказилган «Арт-Ордо» халқаро театр фестивалида иштирок этиб қайтди. Декабрь ойида эса Тожикистоннинг Хўжанд вилоятида «Азиз» спектакли билан ижодий сафарда бўлди. Бу хорижий сафарлар Наманган маданият ва санъатини кенг тарғиб қилишда ўз ҳиссасини қўшди.
Йил давомида вилоятдаги 19 та болалар мусиқа ва санъат мактабидан жами 63 нафар ўқувчи Республика ва халқаро кўрик-танловларда фахрли ўринларни эгаллади. 2019 йилда Россиянинг Москва, Сочи ва Санкт-Петербург шаҳарлари, Қирғизистоннинг Иссиқкўл, Беларуснинг Могилёв шаҳарларида ўтказилган халқаро мусиқа ва санъат танловларида вилоятнинг ёш истеъдодлари катта ютуқларга эришиб, қатор Гран-при мукофотлари билан қайтди.
Вилоят маданияти ва санъатини юксалтириш ишига қўшган муносиб ҳиссаси, самарали хизматлари учун 20 нафардан ортиқ соҳа вакилларига ташаккурнома ҳамда совғалар топширилди.
Хусусан, Алишер Навоий номидаги вилоят мусиқали драма театрига моддий-техник базасини кучайтириш учун 300 миллион сўмлик сертификат совға қилинди. Ўзбекистон санъат арбоби, вилоят мусиқали драма театри режиссёри Каримжон Йўлдошевга эса Наманган шаҳридаги хонадон сертификати тақдим этилди.
Республика нашрларининг вилоят мухбирлари, вилоят билан ҳамкорлик қилаётган хорижий ва республика ахборот манбалари вакиллари, вилоятдаги босма ва интернет нашрлар жамоалари, ижтимоий тармоқлардаги йирик каналлар ва гуруҳлар администраторлари иштирокида ўтказилган тантанали маросимда матбуот ва сўз эркинлигининг ижтимоий-иқтисодий ривожланишдаги аҳамияти алоҳида таъкидланди.
Аҳолига холис ва ҳаққоний ахборот етказишга қўшган муносиб ҳиссаси ҳамда вилоят ижтимоий ҳаётидаги фаол иштироки учун бир гуруҳ журналистлар, блогерлар ва ижтимоий тармоқ фаолларига вилоят ҳокимининг ташаккурномаси ҳамда эсдалик совғаси — компьютер жамланмаси топширилди. Тақдирланганлар орасида «Дарё» нашрининг вилоятдаги мухбири ҳам бор.
Изоҳ (0)