Янги йил байрами кунлари «Тошкент—Самарқанд—Тошкент» йўналишида ҳаракатланадиган «Афросиёб» тезюрар поездининг қўшимча 4 та рейси йўлга қўйилади. Бу ҳақда ЎзА хабар берди.
Маълум қилинишича, мазкур рейслар аҳолининг Янги йил байрамини муносиб кутиб олиши ва дам олиш кунларида Ўзбекистоннинг диққатга сазовор жойларига саёҳат қилиб, мароқли ҳордиқ чиқаришига имконият яратиш мақсадида қўйилади.
Мазкур рейслар 2019 йилнинг 30 ва 31 декабрь ҳамда 2020 йилнинг 1 ва 2 январь кунлари амалга оширилади.
Аввалроқ «Ўзбекистон темир йўллари» 2019 йилнинг 31 декабридан 2020 йилнинг 2 январигача бўлган даврда маҳаллий йўналишларда йўловчиларга чегирмалар тақдим этилишини маълум қилган эди. Имтиёзли бўлган чипталарни фақат темирйўл кассаларида харид қилиш мумкин. Электрон чипталар учун мазкур чегирмалар амал қилмайди.
Изоҳ (0)