Россиянинг Иркутск вилоятидаги ўрмон саноати ходимларига мўлжалланган ётоқхонада юз берган ёнғин оқибатида икки нафар ўзбекистонлик ҳалок бўлди. Бу ҳақда «ТАСС» хабар бермоқда.
Қайд этилишича, ёнғин 25 декабрга ўтар кечаси Залари қишлоғида ётоқхонанинг ёғочдан қурилган икки иншоотида содир бўлган. У ерда 15 киши истиқомат қилган.
Ҳодиса натижасида яна олти киши жабрланган. Улардан беш нафари касалхонада, бир киши оғир аҳволда, яна бир жабрланувчига амбулатор даволанишга рухсат берилган.
Қутқарувчилар очиқ ёнғинни бартараф этган. Ёнғин майдони 350 квадрат метрни ташкил этган.
Таъкидланишича, ёнғин содир бўлган бино рўйхатдан ўтмаган бўлган.
Аввалроқ Россиядаги конда содир бўлган ёнғин оқибатида 3 нафар ўзбекистонлик ҳалок бўлгани, Владивостокда ўзбеклар ухлаб ётган ётоқхонада ёнғин содир бўлгани ҳақида хабар берилган эди.
Изоҳ (0)