Қарши туманидаги «Шойхўжа» маҳалласида яшовчи аҳоли йўлнинг носозлиги боис азият чекаётгани ҳақида ёзгандик. Мазкур мақола омма эътиборига ҳавола этилгач, туман вилоят раҳбари ҳам ушбу масалага эътибор қаратган. «Дарё»га муаммо ҳақида хабар берган Гулираъно Абдиеванинг маълумот беришича, маҳалланинг Ўзбекистон кўчасидаги йўлларда таъмирлаш ишлари олиб борилган.
— Муаммони бартараф қилиш учун ҳатто вилоят ҳокими ҳам маҳалламизга келди, — дейди Гулираъно Абдиева. – Вилоят раҳбари ва туман масъулларига раҳмат. Йўлимизни текислаб беришди. Энди йўл борасида муаммо йўқ.
Мақолада маҳалла аҳлининг электр токидаги муаммолари ҳам тилга олинганди. «Қашқадарё ҳудудий электр тармоқлари» АЖ матбуот хизматининг «Дарё»га маълум қилишича, электр токи муаммосини ҳал этиш уларнинг иши эмас.
— Қарши туманидаги «Шойхўжа» маҳалласи Ўзбекистон кўчасидаги хонадонлар якка тартибда янгидан қурилган уй-жойлар бўлиб, мақолада кўрсатиб ўтилганидек, ушбу кўчадаги аҳоли томонидан ўзбошимчалик билан қўлбола усулда тортилган электр узатиш тармоқлари мавжуд, — дейилади мутасадди ташкилот ахборот хизмати муносабатида. — Натижада электр таъминоти юзасидан мақолада келтириб ўтилган муаммолар юзага келган. Мазкур ҳолат юзасидан уй-жойларни қуришда туман ҳокимлигининг тегишли қарори ва кадастр ҳужжатлари бўлиши лозимлиги ҳамда Ўзбекистон Республикаси Президентининг 2005 йил 16 февралдаги «Уй-жой қурилиши ва уй-жой бозорини янада ривожлантириш чора-тадбирлари тўғрисида»ги ПҚ-10 сонли қарори, шунингдек, Вазирлар Маҳкамасининг 2013 йил 20 февралдаги 54-сонли баённомасига асосан якка тартибдаги уй-жой қурилиши янги мавзеларида зарур муҳандислик коммуникациялар, жумладан, электр қурилмалари билан маҳаллий бюджет маблағлари ҳисобига таъминланиши лозимлигини маълум қиламиз.
Эслатиб ўтамиз, «Қишда лой кечамиз, ёзда эса чанг ютиб яшаймиз». Қарши туманида яшовчи аҳоли мутасаддилар эътиборсизлигидан нолимоқда» сарлавҳали мақолада кўчанинг ярмида симёғоч йўқлиги ва кучланиш пастлиги ҳам тилга олинган эди.
Изоҳ (0)