Бухорода 3 ойдан буён ойлик маош билан таъминланмаган «Бухгазсаноат қурилиш» акциядорлик жамиятининг 1500 га яқин ишчи-ходимларига 9 миллиард 300 миллион сўм маблағ ундириб берилди. Бу ҳақда «Дарё»га вилоят прокуратураси ахборот хизмати маълум қилмоқда.
Хабарга кўра Бухоро халқаро аэропорти ҳузурида барпо этилаётган расмий меҳмонларни кутиб олиш биноси қурилишида иш бажариб келган «Бухгазсаноат қурилиш» акциядорлик жамиятининг 1500 га яқин ишчи-ходимлари «Ўзбекнефтегаз» миллий холдинг компанияси объектларининг газ конларида қурилиш-монтаж ишларини бажариб келган. Мазкур объектда ишлар тўлиқ бажарилишига қарамасдан ишчи-ходимларга ойлик маош ўз вақтида тўланмаган.Аниқланишича, жорий йилнинг май ойидан буён қурилиш ишлари давом этаётган мазкур объектда ишлаётган ишчиларнинг меҳнат ҳақлари «Ўзбекнефтегаз» миллий холдинг компанияси томонидан 4 ой кечиктирилган.
Бухоро вилоят ҳокимлиги ҳамда вилоят прокуратураси ҳамкорлигида молиявий-соғломлаштириш ишчи-гуруҳи тузилган. Ишчи-гуруҳ томонидан олиб борилган саъй-ҳаракатларга кўра «Ўзбекнефтегаз» компаниясидан 2018 йил ва 2019 йилнинг 1-чораги бўйича жами 23 миллиард сўм қарздорлик «Бухгазсаноат қурилиш» акциядорлик жамияти фойдасига ундириб берилган.
Жорий йилнинг сентябрь, октябрь, ноябрь ойлари учун 9 миллиард 300 миллион сўм миқдорида ундирилган маблағлар ишчи ходимларга етказилган. Айни пайтда декабрь ойи иш ҳақи учун тегишли миқдордаги маблағ ундирилиши кўзда тутилмоқда.
Изоҳ (0)