Бухорода жаҳл устида куёвини пичоқлаб, унга оғир тан жароҳати етказган қайнотага уч йил муддатга озодликдан чеклаш жазоси тайинланди. Бу ҳақда «Дарё»га Жиноят ишлари бўйича Когон туман суди раиси Қосим Холов маълум қилди.
Ҳолатга кўра ғиждувонлик фуқаро О.Я. қизининг оиласида чиққан кичик можаро сабаб туманнинг Лабирўт қишлоғида яшовчи куёви Ў.Р.нинг хонадонига борган ва жанжал кўтарган. Куёвининг онаси бақир-чақир сабабини сўрашга улгурмай, О.Я. куёвининг синглисини қаттиқ итариб юборган. Куёв қайнотасининг қўпол хатти-ҳаракатидан таъсирланиб, тандирхонда турган болтани қўлига олган. Бироқ Ў.Р.нинг онаси ўғлининг қўлидан болтани тортиб олган ва уни маҳкам ушлаганча, ерга ўтириб олган.
Шу орада қайнота автомашинасида бўлган ошхона пичоғини олишга улгуриб, куёви томонга бостириб келган. Куёв қаршилик кўрсатиш ва ўзини ҳимоялаш мақсадида қайнонатасининг кўкрагидан тепиб юборган. Ўзини ўнглаб олган қайнота жаҳл устида куёвининг қорин қисмига қўлидаги ошхона пичоғи билан бир маротаба қасддан уриб, унинг ҳаёти учун хавфли бўлган оғир тан жароҳати етказган.
Оғир тан жароҳати олган Ў.Р. қўшниларнинг тезкор кўмаги билан касалхонага келтирилган ва ҳаёти сақлаб қолинган.
Суд-тиббиёт экспертизаси хулосасига кўра беморга кўкрак ва қорин бўшлиғига қон кетиши, диафрагма жароҳатланиши натижасида келиб чиққан қон кетишдан кейин шок ва анемиянинг юзага келиши ташхиси қўйилган.
Суд ҳукмига кўра, қайнота томонидан куёвига етказилган зарар тўлиқ қопланган. О.Я.га нисбатан Ўзбекистон Республикаси Жиноят кодекси 104-моддасининг 1-қисмида назарда тутилган жиноятни содир этганликда айбли, деб топилган уч йил-у уч ой муддатга озодликдан чеклаш жазоси қўлланилган.
Изоҳ (0)