Buxoroda 3 oydan buyon oylik maosh bilan ta’minlanmagan “Buxgazsanoat qurilish” aksiyadorlik jamiyatining 1500 ga yaqin ishchi-xodimlariga 9 milliard 300 million so‘m mablag‘ undirib berildi. Bu haqda “Daryo”ga viloyat prokuraturasi axborot xizmati ma’lum qilmoqda.
Xabarga ko‘ra Buxoro xalqaro aeroporti huzurida barpo etilayotgan rasmiy mehmonlarni kutib olish binosi qurilishida ish bajarib kelgan “Buxgazsanoat qurilish” aksiyadorlik jamiyatining 1500 ga yaqin ishchi-xodimlari “O‘zbekneftegaz” milliy xolding kompaniyasi obyektlarining gaz konlarida qurilish-montaj ishlarini bajarib kelgan. Mazkur obyektda ishlar to‘liq bajarilishiga qaramasdan ishchi-xodimlarga oylik maosh o‘z vaqtida to‘lanmagan.Aniqlanishicha, joriy yilning may oyidan buyon qurilish ishlari davom etayotgan mazkur obyektda ishlayotgan ishchilarning mehnat haqlari “O‘zbekneftegaz” milliy xolding kompaniyasi tomonidan 4 oy kechiktirilgan.
Buxoro viloyat hokimligi hamda viloyat prokuraturasi hamkorligida moliyaviy-sog‘lomlashtirish ishchi-guruhi tuzilgan. Ishchi-guruh tomonidan olib borilgan sa’y-harakatlarga ko‘ra “O‘zbekneftegaz” kompaniyasidan 2018-yil va 2019-yilning 1-choragi bo‘yicha jami 23 milliard so‘m qarzdorlik “Buxgazsanoat qurilish” aksiyadorlik jamiyati foydasiga undirib berilgan.
Joriy yilning sentabr, oktabr, noyabr oylari uchun 9 milliard 300 million so‘m miqdorida undirilgan mablag‘lar ishchi xodimlarga yetkazilgan. Ayni paytda dekabr oyi ish haqi uchun tegishli miqdordagi mablag‘ undirilishi ko‘zda tutilmoqda.
Izoh (0)