АҚШ Сенатининг халқаро ишлар бўйича қўмитаси Россияга қарши янги санкцияларни ўзида жамлаган ДАСКА қонун лойиҳасини маъқуллади. Кескинлиги бўйича «дўзахдан санкция» номини олган лойиҳа 17 та овоз тўплаган, беш киши қарши овоз берган, деб хабар қилади Meduza.
Унга кўра «Россиянинг бошқа мамлакатлардаги демократик жараёнларига аралашуви»га кўмаклашган банклар тақиққа учрайди, Америка компанияларининг Россия нефть лойиҳаларида иштироки тўхтатилади, 14 кундан ортиқ муддатга Россиянинг янги суверен қарзи билан битимлар ва Россиянинг суюлтирилган газ лойиҳаларига сармоялар киритиш тақиқланади.
Қўмитанинг маъқуллаши эндиликда мазкур ҳужжат Сенат томонидан тўлиқ таркибда кўриб чиқилишини билдиради. Бу жараён қанча вақт давом этиши номаълум.
Мазкур қонун лойиҳаси 2019 йилнинг февралида киритилган бўлса-да, анча вақт ҳаракатсиз қолган. Таъкидланишича, худди шу турдаги ҳужжат 2018 йилда ҳам таклиф этилган, бироқ у қабул қилинмаган.
Эслатиб ўтамиз, аввалроқ АҚШ мудофаа бюджетига Россиянинг «Шимолий оқим—2» ва «Туркия оқими» газ қувурларига қарши санкциялар ҳам киритилган эди.
Изоҳ (0)