17 декабрь Туркиянинг Анталия шаҳрида қўлида тўппончаси бор Ўзбекистон фуқароси хусусий банклардан бирига бостириб кирди, деб хабар берди «Haberler» нашри.
Нашр хабарига кўра, босқинчи банк қўриқчиларини гаровга олган. Воқеа жойига полиция ва махсус кучлар жалб қилинган. Музокаралардан сўнг босқинчи таслим бўлган.
Таъкидланишича, эркак шифокор бўлиб ишлайди ва уни чув туширишган. Шу сабабли у банкка бостириб кириб, жамоатчилик эътиборини ўзига қаратмоқчи бўлган.
Анталия губернаторининг ёзма баёнотида келтирилишича, банкка ҳужум уюштирган шахс 41 ёшли Ўзбекистон фуқароси бўлиб, унинг қўлидаги тўппонча қўлбола бўлган.
«Бугун соат тахминан 09:45 да 1979 йилда туғилган Ўзбекистон фуқароси қўлида тўппонча билан банкка бостириб кириб, у ердагиларни гаровга олган. У ўз хатти-ҳаракатлари орқали жамоатчиликнинг эътиборини ўзига қаратганидан сўнг полициячиларга таслим бўлди», — дейилади баёнотда.
Полиция воқеа юзасидан тергов-суриштирув ишларини давом эттирмоқда.
Изоҳ (0)