Австралиянинг айрим ҳудудларида ҳаво ҳарорати 45 даражагача кўтарилди. Бундан олдинги рекорд 2013 йилнинг 7 январида ўрнатилган. Ўшанда ҳаво ҳарорати 40,3 даражага етган эди, деб хабар беради RTVI.
Метеорологларнинг фикрича, ҳаво ҳароратининг кўтарилиши Ҳинд океанидаги иқлим ўзгаришига боғлиқ: океаннинг ғарбий қисмида, Африка қирғоқларида тез-тез ёғингарчилик рўй бериб, сув тошқинлари бўлмоқда. Жануби-шарқий Осиё ва Австралия эса қурғоқчиликни бошидан ўтказяпти.
Қитъада ҳаво ҳароратининг ошиши 1950 йиллардан буён кузатилмоқда. Бунга глобал исиш сабаб бўлмоқда. Бундан ташқари, Австралия жон бошига ҳисоблаганда ҳавога ис газини энг кўп ажратадиган давлатлардан бири ҳисобланади. Чунки мамлакат ҳамон электр энергиясини ишлаб чиқаришда ёнилғидан фойдаланиб келади.
2019 йил Австралияда учун сўнгги юз йилликдаги энг иссиқ йил бўлди. Ноябрь ойида Янги Жанубий Уэльс штати губернатори фавқулодда ҳолат эълон қилганди. 12 ноябрь куни Сиднейда ҳалокатли даража эълон қилинган бўлиб, ҳукумат 500 га яқин мактабларни ёпган, 400 мингдан ортиқ одамни эвакуация хавфидан огоҳлантирган эди.
Австралия ҳудудида ҳаво ҳароратининг исиб кетиши туфайли юзага келган энг йирик ёнғинлар 2009 йилда содир бўлган. Ўшанда 173 киши ҳалок бўлган, 414 киши жароҳат олган эди.
Изоҳ (0)