АҚШ Конгрессининг Вакиллар палатаси Дональд Трампнинг президент лавозимидан четлатилиши учун овоз берди, дея хабар бермоқда Meduza.
Конгрессменлар Трампни айбловнинг ҳар икки моддаси — ҳокимият мансабини суиистеъмол қилиш (216 та овоз зарур бўлган ҳолатда 230 та овоз олди) ва Конгресс фаолиятига тўсқинлик қилиш (229 та овоз олди) бўйича айбдор деб топди. Ҳар икки ҳолатда ҳам Республикачилар партияси вакиллари тўлиқ таркибда қарши овоз берди.
Трампга нисбатан ҳокимият мансабини суиистеъмол қилиш бўйича айблов у Украина ҳукуматидан Жо Байденнинг ўғлига нисбатан тергов очишга уринишлари ортидан эълон қилинган — Жо Байден бўлажак президент сайловида Трампнинг асосий рақиби саналади. Президент импичмент жараёни доирасида олиб борилган суриштирув ишларида президент маъмуриятининг иштирок этишини тақиқлаб қўйгач, унга нисбатан конгресс ишига халал бериш айблов илгари сурилган эди.
Энди Трампнинг ҳокимиятдан четлатилиши учун сенаторларнинг учдан икки қисми ушбу қарорни қўллаб, овоз бериши лозим. Таҳлилчиларнинг фикрича, воқеаларнинг бундай ривожи эҳтимоли жуда паст, чунки Сенатда кўпчилик ўрин Республикачиларга тегишли — Дональд Трамп ҳам Республикачилар партияси вакили.
Трамп импичменти Конгресснинг Вакиллар палатаси томонидан қўллаб-қувватланган АҚШ тарихидаги учинчи президентга айланди — бунгача бундай ҳолат 1868 йилда Эндрю Жонсон ва 1998 йилда Билл Клинтон билан юз берган. Жонсоннинг ҳам, Клинтоннинг ҳам ҳолатида ҳам Сенат уларнинг фойдасига овоз берган ва ҳар иккиси ўз лавозимида қолган.
Изоҳ (0)