Конго демократик республикасидаги кобалт конларида болалар ҳалок бўлаётгани муносабати билан Apple, Google’га тегишли Alphabet, Tesla, Dell ва Microsoft компаниялари устидан судга жамоавий шикоят аризаси киритилди, деб хабар берди Meduza.
Вашингтондаги судга Конгода яшовчи 14 оила мурожаат қилган. Уларнинг фарзандлари кобалт конида ё ҳалок бўлган ёки иш жараёнида жароҳат олган. Ушбу кон Британиянинг Glencore хом ашё трейдерига тегишли. Гап бешта ўлим ҳолати, қолган ҳолларда эса оғир жароҳатлар ҳақида кетмоқда.
Glencore қазиб олинган кобалтни Umicore компаниясига сотади. Бу компания эса кобалтни технологик компанияларга сотади. Технологик компаниялар кобалтда литий-ионли батареялар ишлаб чиқаришда фойдаланади.
Шикоят аризалари муаллифларининг таъкидлашича, Apple, Google, Tesla, Microsoft ва Dell Конгода кобалт қазиб олишда хавфли шароитларда болалар меҳнатидан фойдаланилишини билган.
«Бироқ шунга қарамай улар болалар меҳнатига барҳам бермаган. Аслида кобалт етказиб бериш занжирини назорат қилишга уларда ваколат ҳам, пул ҳам бўлган. Айнан компанияларнинг эътиборсизлиги болалар ўлими ва жароҳатланишига олиб келган», — дейилади шикоят аризасида.
Аризачилар жавобгарлардан жабрланган болаларнинг дори-дармонларига сарфланиши учун махсус жамғарма ташкил этишни ҳамда жароҳатланганларга қилинаётган тиббий муолажаларни назорат қилишни талаб қилмоқда.
Glencore The Guardian газетасига болалар меҳнатидан фойдаланмаслигини айтган. Нашр, шунингдек шикоят қилинган компаниялардан ҳам изоҳ олишга уринган. Шу кунга қадар ушбу компаниялардан ҳеч бирига бундай айблов қўйимагани айтилмоқда.
Бутун дунёда истеъмолда бўлган кобалтнинг 60 фоизи Конгода қазиб олинади. Amnesty International 2016 йилда Конгодаги кобалт конларида болалар меҳнатидан фойдаланилишини тахмин қилган эди.
Изоҳ (0)