1 декабрь куни 2012 йилдан бери Қозоғистоннинг биринчи президенти куни давлат байрами нишонланади. Ушбу кун биринчи президент Нурсултон Назарбоевга республика олдида қилган хизматлари учун миннатдорлик рамзи сифатида байрам қилинади, деб ёзган «РИА Новости».
Назарбоев Қозоғистоннинг президент сифатида қарийб 30 йил бошқарди ва давлат раҳбари сифатидаги ваколатларини 2019 йилнинг 20 мартида топширди. Ушбу воқеадан кейин сенат спикери бўлган Қосим-Жўмарт Тўқаев президент ваколатларини қабул қилди.
Назарбоев Хавфсизлик кенгаши раҳбари ва Нур Отан партияси етакчилигини ўзида сақлаб қолди. Октябрда Тўқаев Назарбоевнинг кадрлар сиёсати бўйича ваколатларини янада кенгайтирди ва мамлакатда вазирларни лавозимга тайинлаш Хавфсизилик кенгаши билан келишган ҳолда амалга оширилиши ҳақида янги Фармон чиқарди. ТИВ, ИИВ ва мудофаа вазирлиги раҳбарлари бундан мустасно.
2015 йил 26 апрелдаги президентлик сайловларида Назарбоев бешинчи бор ғалаба қозонган ва 98 фоиз овоз олган. Унинг президентлик муддати 2020 йилда поёнига етиши лозим эди. Қозоғистон конституциясига кўра Назарбоев Қозоғистоннинг биринчи президенти сифатида президентликка чекланмаган миқдорда ўз номзодини қўйиш ҳуқуқига эга.
Қозоғистоннинг биринчи президенти куни якшанбага тўғри келиб қолгани учун душанба – 2 декабрь санаси байрам ва дам олиш куни деб эълон қилинган.Қозоғистоннинг биринчи президенти кунида республиканинг барча вилоятларида тантаналар, спорт мусобақалари ва маданият тадбирлари ўтказилади.
Назарбоев 2018 йил июль ойида Хавфсизлик кенгаши раҳбарлиги лавозимини умрининг охиригача эгаллаш ҳуқуқини белгилаш ҳақидаги қонунни имзолаган.
Изоҳ (0)