Тошкентда туғилган уч эгизакка Шавкат, Мирзиё, Миромон деб исм қўйилди. Оила машинадан умидвор эмас

Тошкентдаги 1-сон шаҳар перинатал марказида 25 ноябрь куни уч эгизак дунёга келди. Чақалоқларга Шавкат, Миромон ва Мирзиё деб исм қўйилган. Оила бошлиғи Бекзод Боқиевнинг «Дарё»га маълум қилишича, болаларнинг ҳам, онанинг ҳам аҳволи қониқарли экани айтилмоқда.

«Асли Сурхондарёданмиз, Чилонзорда ижара уйда, вақтинча рўйхатдан ўтиб яшаймиз. Аёлим болалар боғчасида ишлайди, ўзим хусусий корхона ходимиман. Иккита ўғлимиз бор эди, энди бешта бўлди. Бундан жуда ҳам хурсандмиз», — деди Бекзод Боқиев.

Унинг айтишича, чақалоқларга «Президент совғаси» сифатида бирор автомобиль совға қилинишидан умидвор бўлиб Президент Шавкат Мирзиёев шарафига исм қўйилмаган.

«Ҳеч нарсадан умидвор бўлганимиз йўқ. Халқни, юртни ўйлайдиган, элга нафи тегадиган инсонлар бўлсин деб боболари шундай исм қўйди. c

Эслатиб ўтамиз, 2019 йилда Жиззах, Хоразм, Бухоро, Қашқадарё вилоятларида туғилган уч эгизакларга Шавкат, Миромон ва Мирзиё исмлари Фарғонада туғилган уч эгизакка эса Шавкатжон, Зироатхон ва Саидахон исмлари қўйилган эди. Бухорода туғилган Шавкат, Миромон ва Мирзиёнинг отасига Президент номидан Cobalt, Қашқадарёда туғилган Шавкат, Миромон ва Мирзиёларнинг отасига эса Spark берилган эди. 2018 йилда эса Андижон, Қўқон ва Тошкентда Шавкат, Миромон ва Мирзиёлар дунёга келган эди. Андижонлик эгизакларнинг отасига Spark, қўқонлик ва тошкентлик эгизакларнинг оталарига эса Cobalt совға қилинган.

Айни вақтда, исми Президент ва унинг оила аъзолари шарафига эмас, бошқача бўлган уч эгизакларга бирор қимматбаҳо совғалар топширилгани ҳақида хабарлар тарқалмаган.