Олий Мажлис Сенатининг 30 ноябрь куни чақирилган 24-ялпи мажлисида «2020 йил учун Ўзбекистон Республикасининг Давлат бюджети тўғрисида»ги қонун маъқулланди. Энди у Президент томонидан тасдиқланиши керак.
Сенат матбуот хизматининг хабар беришича, молия вазири Жамшид Қўчқоров ушбу қонун ҳақида маъруза қилди.
Унинг сўзларига кўра, 2020 йилда Ўзбекистонда ялпи ички маҳсулотнинг 5,5 фоизга, саноат маҳсулотлари ишлаб чиқаришнинг 6,5 фоизга, қишлоқ хўжалиги маҳсулотлари ишлаб чиқаришнинг 4 фоизга, капитал қуйилмалар ҳажмининг камида 10 фоизга, чакана савдо айланмасининг 5,6 фоизга, хизмат кўрсатиш ҳажмининг 5,7 фоизга ўсиши прогноз қилинган.
Бунда ўсиш қурилиш соҳасида 11,8 фоиз, саноатда 6,4 фоиз ва хизматлар соҳаси 6,1 фоизни, қишлоқ хўжалигида эса 3 фоизни ташкил этиши кутилмоқда. 2019 йил якунларига кўра давлат бюджети даромадлари 112 триллион 600 миллиард сўмни ёки ўтган йилга нисбатан 42 фоизга ошиши кутилмоқда.
Ўзбекистоннинг ҳар бир фуқароси давлат бюджети маблағларини шакллантириш ва улардан фойдаланишда иштирок этади. Давлат бюджети маблағларини шакллантиришда солиқ тўловчи, улардан фойдаланишда давлат томонидан тақдим этиладиган қулайликлар ва хизматларнинг истеъмолчиси сифатида иштирок этади.
Изоҳ (0)