Марказий Осиё давлатлари раҳбарларининг иккинчи маслаҳат учрашуви доирасидаги тадбирлар якунига етди. Бу ҳақда Президент матбуот хизмати хабар берди.
Таъкидланишича, делегациялар раҳбарлари Тошкент халқаро аэропортга биргаликда келди. Ўзбекистон Президенти Шавкат Мирзиёев минтақа давлатлари раҳбарларини шахсан кузатиб қўйди.
Шавкат Мирзиёев 28 ноябрь, пайшанба куни мазкур тадбирда иштирок этиш учун Ўзбекистонга ташриф буюрган Туркманистон президенти Гурбангули Бердимуҳамедовни қабул қилди. Шу куннинг ўзида Туркманистон раҳбарига Ўзбекистон Фанлар академиясининг фахрий академиги унвони топширилди.
Ўзбекистон Президенти 29 ноябрь, жума куни иккинчи маслаҳат учрашувида иштирок этиш учун келган Қозоғистоннинг биринчи президенти – элбоши Нурсултон Назарбоев, Тожикистон президенти Эмомали Раҳмон ҳамда Қирғизистон президенти Сооронбай Жээнбеков билан учрашди.
Шавкат Мирзиёев Марказий Осиё давлатлари раҳбарларининг иккинчи маслаҳат учрашувида муҳим ташаббусларни илгари сурди. Навбатдаги маслаҳат учрашуви келгуси йили Қирғизистонда ўтказилиши маълум қилинди.
Олий даражадаги тадбирдан сўнг давлат раҳбарлари Кўксарой қароргоҳига дарахт экди.
Изоҳ (0)