Тошкент халқаро аэропорти яқинида йирик меҳмонхона қурилади

Wyndham Hotels & Resorts яқин икки йил ичида МДҲнинг бир неча мамлакатларида 15 та янги меҳмонхона очишни режалаштирмоқда, деб хабар берди Spot.

Wyndham Hotels & Resorts президенти ва бошқарув раиси Димитрис Маникис минтақани саноатни ривожлантириш учун истиқболли деб ҳисоблайди.

Ҳозирда компания Тошкентдаги Wyndham Tashkent (собиқ Dedeman Silk Road Tashkent) ва Ramada меҳмонхоналарига эгалик қилади. Янги меҳмонхона Тошкент халқаро аэропортига яқин жойда қурилади.

Хабар беришларича, меҳмонхонада 100 га яқин номер (хусусан улардан 29 таси люкс), очиқ бассейнлар, тўртта ресторан, бар, бизнес-зал, офислар, конференс-заллар бўлади.

Бундан ташқари, компания Бухорода ҳам меҳмонхона очишни режалаштирмоқда.

Wyndham Garden Tashkent International Airport меҳмонхонасининг очилиши 2021 йилга мўлжалланмоқда.

Wyndham Hotels & Resorts олти қитъадаги 80 дан ортиқ мамлакатларда 9 200 тадан ортиқ меҳмонхонага эга бўлган дунёдаги энг йирик франчайзинг компания ҳисобланади.