«Дарё» интернет нашрида ИИБ ходими сўроқ пайтида Ғиждувон туманидаги мактаб ўқувчисига куч ишлатгани ва ўғрилик жиноятини бўйнига олишга мажбур қилгани хусусида мақола эълон қилинганди. Бухоро вилоят ИИБ мазкур мақолага муносабат билдирди.
Вилоят ИИБ ахборот хизматининг расмий баёнотида ёзилишича, 2019 йил 2 ноябрь куни соат 11:00 дан 4 ноябрь куни соат 16:00 га қадар бўлган вақт оралиғида номаълум шахс Ғиждувон тумани «Шўрча» қишлоғида яшовчи фуқаро Д.Раупованинг яшаш хонадонига ғайриқонуний равишда кириб, ҳовлисининг супасида ўрнатилган баҳоси 500 минг сўм бўлган сув насоси, ётоқхона ичидан баҳоси 1 миллион сўм бўлган тикув машинаси ҳамда баҳоси 300 минг сўм бўлган ёстиқ жилдларини ўғирлаган.
Мазкур ҳолат юзасидан 2019 йил 6 ноябрь куни Ғиждувон тумани ИИО ФМБ ҳузуридаги тергов бўлинмаси томонидан номаълум шахсга нисбатан Жиноят кодексининг 169-моддаси 2-қисми «г» банди билан жиноят иши қўзғатилган.
Ушбу жиноятни содир этган шахсни аниқлаш мақсадида тезкор ходимлар томонидан бир қатор тезкор-суриштирув ҳаракатлари олиб борилган. Жумладан, 2019 йил 11 ноябрь куни соат 12:05 да Ғиждувон тумани ИИО ФМБ 1-сон ИИБ жиноят қидирув гуруҳи тезкор вакиллари катта лейтенант М.Шарипов ҳамда лейтенант Л.Наимовлар Д.Раупованинг уйида содир этилган жиноятни фош этиш мақсадида ушбу қишлоқда яшовчи 2004 йилда туғилган, вояга етмаган Ф.Тошпўлатов билан суриштирув ишларини олиб бориш учун у таҳсил олаётган 31-мактаб директори Н.Авезовнинг рухсати билан мактаб ўқитувчиси Н.Усмонов иштирокида ўқувчини олиб кетган. Ғиждувон тумани ИИО ФМБ 1-сон ички ишлар бўлимига олиб келинган ўқувчи билан фуқаро Д.Раупованинг яшаш уйида содир этилган жиноят бўйича суриштирув ўтказилиб, суҳбат олиб борилган.
Ушбу ходимлардан ҳолат юзасидан сўралганда вояга етмаган Ф.Тошпўлатов билан ўқитувчиси Н.Усмонов иштирокида суҳбатлашилганини, орадан 10-15 дақиқа ўтиб Ф.Тошпўлатовнинг онаси М.Қ.Фозилова ИИБга келиб, вояга етмаган ўғли билан унинг розилигисиз суриштирув ҳаракатлари олиб борилаётганлигига эътироз билдириб, тушунтириш хатини охирига етказишига рухсат бермасдан, суриштирув ҳаракатларини якунига етказишга тўсқинлик қилиб, фарзандини ИИБ биносидан олиб чиқиб кетганлигини маълум қилишди.
Фуқаро М.Фозилова 2019 йил 1- ноябрь куни ўғли Ф.Тошпўлатов билан Ғиждувон туман прокуратурасига бориб, ИИБ ходимлари ўғлини урганлиги ҳақида билдириб, суд тиббий экспертизасидан ўтиш учун йўлланма сўраб мурожаат қилган. Туман прокуратураси терговчиси томонидан судга оид тиббий экспертизаси тайинланган. Шу куни соат 21:10 да Ф.Тошпўлатов РШТЁИМ Бухоро вилояти филиалига мурожаат қилган.
РШТЁИМ Бухоро вилояти филиалида Ф.Тошпўлатов шифокорлар кўриги, рентген ҳамда УЗИ аппаратларида текширувдан ўтказилиб, танасида жароҳат излари аниқланмаган, унинг сўзидан «Чап юзи юмшоқ тўқималарининг лат ейиши» ташхиси қўйилиб, вилоят суд тиббий экспертизаси кўригидан ўтказилган. Ҳозирда суд тиббий экспертизаси хулосаси Ғиждувон тумани прокуратурасига тақдим этилмаган.
Мазкур ҳолат юзасидан Ғиждувон тумани прокуратураси томонидан терговолди текширув ҳаракатлари Ғиждувон тумани ИИО ФМБ масъул ходимлари томонидан хизмат текшируви ўтказилмоқда.
Бухоро вилояти ИИБ ахборот хизмати раҳбари Қувват Ярашев «Дарё» мухбири билан суҳбатда расмий баёнот ИИБ ходимининг хизмат текшируви ҳужжатларидаги кўрсатмасигагина асосан ёзилгани, бироқ ҳали хизмат текшируви давом этаётгани, тегишли одамлардан тушунтириш хатлари олинмаганини билдирган.
— Суриштирув давомида барча ҳолатларга аниқлик киритилади. Бола сўроқ қилинган пайтда жараёнда ўқитувчи иштирок этган-этмагани муаммони ҳал қилмайди. Иштирок этмаган бўлса, хизмат интизоми бузилиши ҳолатига ҳам ойдинлик киритилади. Энг асосийси, жиноятнинг ким томонидан содир этилганига аниқлик киритиш. Суриштирув-тергов жараёнлари натижаси ҳақида маълум қилинади, — дейди вилоят ИИБ ахборот хизмати раҳбари Қувват Ярашев.
Изоҳ (0)