Ўзбекистонга ноқонуний олиб кирилган 100 мингдан ортиқ пиротехника воситалари йўқ қилинди (фото)

Ўзбекистон Давлат божхона қўмитаси томонидан пиротехника воситаларини республика ҳудудига олиб киришга ва ноқонуний савдосига қарши қатор тадбирлар амалга оширилди. Бу ҳақда «Дарё»га қўмита матбуот хизмати хабар берди.

Жумладан, Давлат божхона қўмитаси Контрабанда ва божхона қонунчилиги бузилишига қарши курашиш бошқармаси ходимлари томонидан Тошкент вилояти Зангиота туманида ўтказилган тезкор тадбирда А.А. исмли шахс ҳеч қандай ҳужжатлари бўлмаган, хорижда ишлаб чиқарилган 67 290 дона пиротехника воситаларини ноқонуний сотаётган вақтда қўлга олинган.

Мазкур ҳолат юзасидан Давлат божхона қўмитаси томонидан Жиноят кодексининг тегишли моддаси билан жиноят иши қўзғатилиб, тергов органига юборилган.

Шунингдек, қўмитанинг, бошқарма ходимлари Бухоро вилоятида рўйхатдан ўтган масъулияти чекланган жамият номига олиб келинган ёғоч маҳсулотлари орасига йирик миқдордаги пиротехника воситалари ва биофаол қўшимчалар яширилганлигини аниқлаб, мазкур ҳолат юзасидан божхона органлари томонидан жиноят иши қўзғатилган.

Жиноят ишлари бўйича Тошкент шаҳар Олмазор туман суди ҳукмига мувофиқ умумий қиймати 4 миллиард 200 миллион сўмдан ортиқни ташкил этувчи 102 118 дона пиротехника воситалари ҳамда 5 613 дона сифати кафолатланмаган биофаол қўшимчалар Бухоро вилояти божхона бошқармаси ходимлари ҳамда тегишли идоралар вакиллари билан ҳамкорликда белгиланган тартибда йўқ қилинган.

Вазирлар Маҳкамасининг «Ўзбекистон Республикаси ҳудудида пиротехника воситалари айланишини тартибга солиш чора-тадбирлари тўғрисида»ги қарори билан пиротехника воситаларини ноқонуний айланишининг олдини олиш, истеъмолчиларнинг ҳуқуқларини ҳимоя қилинишини таъминлаш мақсадида Ўзбекистон ҳудудида лицензиясиз пиротехника воситаларини олиб кириш, ишлаб чиқариш, ташиш, сақлаш, сотиш ва улардан фойдаланиш тақиқланган.

Шундан келиб чиққан ҳолда, Маъмурий жавобгарлик тўғрисидаги кодекснинг 185-1-моддаси билан пиротехника буюмларини қонунга хилоф равишда ишлаб чиқариш, тайёрлаш, сақлаш, ташиш, жўнатиш, улардан фойдаланиш, худди шунингдек, уларни қонунга хилоф равишда Ўзбекистонга олиб кирганлик ёки ўтказганлик учун маъмурий жавобгарлик белгиланган бўлиб, ҳуқуқбузарлик ашёларини мусодара қилиб, энг кам иш ҳақининг йигирма бараваригача миқдорда жарима солишга сабаб бўлади.

Агар пиротехника буюмларининг қонунга хилоф муомаласи анча миқдорда ёки маъмурий жавобгарлик қўлланилганидан сўнг содир этилган бўлса, Жиноят кодексининг 250-1-моддасига кўра жиноий жавобгарлик белгиланган.