Инновацион ривожланиш вазирлиги томонидан ўтказилган стартап лойиҳалар танлови ғолиблари — Agrowin ва N.E.F. стартап-корхоналари вакиллари USAID дастурининг Марказий Осиёда рақобатбардошлик, савдо ва иш ўринларини яратиш лойиҳаси таклифига биноан Қозоғистоннинг Чимкент шаҳрида ўтказилган Марказий Осиё савдо форумида иштирок этди. Бу ҳақда «Дарё»га вазирлик матбуот хизмати маълум қилди.
Форум минтақавий савдони рағбатлантиришга бағишланган энг йирик йиллик тадбирлардан бири ҳисобланади. Бу галги мавзу «Мева-сабзавот соҳасидаги инновациялар ва инвестицион ёндашувлар« бўлиб, унда Марказий ва Жанубий Осиё, Европа ва АҚШ давлат сектори вакиллари, соҳа мутахассислари иштирок этди.
Мазкур форум доирасида N.E.F. стартап-корхонаси Қозоғистон мева-сабзавотчилик илмий-тадқиқот институтининг «Сариағаш« минтақавий филиали билан қўшма корхона ташкил этиш бўйича шартнома имзолади. N.E.F. (New ecological feed — «Янги экологик озиқа») қорамол, қўй, қуён, парранда, балиқ учун ем маҳсулотлари тайёрлашнинг янги технологиясини ишлаб чиқаришга жорий этган. Мазкур стартап жамоаси витаминларга бой омихта озиқалар, парранда, чорва ёки бошқа ҳайвон турларининг эҳтиёжларидан келиб чиққан ҳолда ем маҳсулотлари ва қўшимчалар тайёрлаш, қишки мавсумда чорва учун барра ўт етиштириш билан шуғулланади.
Ҳамкорликнинг мақсади ташкилотларнинг техник салоҳиятини бирлаштириш, тажриба алмашиш ва икки томонлама ўзаро манфаатли алоқаларни ривожлантиришдир. Шартнома, шунингдек, витамин маҳсулотлари, омихта ем ва уларнинг махсус таркибий қўшимчаларини ишлаб чиқаришни кўзда тутади.
Agrowin стартап лойиҳаси 2019 йилда ташкил этилган бўлиб, in vitro усулида мевали, манзарали, хона кўчатлари ва пайванд тагларини кўпайтириш билан шуғулланади. Лойиҳа муаллифларининг қайд этишича, улар Қозоғистон, Қирғизистон компаниялари билан бизнес алоқаларини йўлга қўйиб, халқаро тадбирда иштирок этишнинг илк тажрибасига эга бўлди.
Изоҳ (0)