20 ноябрь, чоршанба куни «Самара—Чимкент» йўналиши бўйлаб ҳаракатланаётган ва ичида 57 киши, шу жумладан, 55 нафар Ўзбекистон фуқароси бўлган автобус Қозоғистоннинг Ақтўбе вилояти Хромтау тумани ҳудудида техник носозлик туфайли тўхтаб қолган. Бу ҳақда Ўзбекистон Ташқи ишлар вазирлиги томонидан хабар берилди.
Ўзбекистон Ақтау шаҳридаги бош консулхонаси томонидан хабар берилишича, Қозоғистоннинг Фавқулодда вазиятлар бўйича Ақтўбе вилоят департаменти ёрдамида автобус йўловчилари иссиқ жойга эвакуация қилинган.
Қайд этилишича, йўловчилар орасида тиббий ёрдамга муҳтожлар мавжуд эмас. Совуқ об-ҳавога қарамай, автобусда ёз учун мўлжалланган ёнилғидан фойдаланилгани ва у музлаб қолгани носозликка сабаб бўлган. Айни пайтда автобусни таъмирлаш ишлари олиб борилмоқда.
Бош консулхона вазиятни назоратга олган ва Қозоғистоннинг тегишли идоралари билан доимий алоқада бўлиб турибди, дейилади ТИВ хабарида.
Шу билан бирга, ТИВ Консуллик-ҳуқуқий департаменти яна бир бор Ўзбекистон фуқаролари эътиборини автобусларда ёки автомобиль транспортининг бошқа турларида қиш мавсумида Қозоғистонга киришда ёки унинг ҳудудидан ўтишда эҳтимолий хатарларни ҳисобга олиш ва тегишли чоралар кўриш зарурлигига қаратмоқда.
Изоҳ (0)