Исроил президенти бирлашган ҳукумат шакллантиришни энди парламент депутатларига топширди

Исроил президенти Реувен Ривлин «Кахол-Лаван» мухолифат партияси вакили Бени Ганц ва бош вазир Биньямин Нетаньяху муваффақиятсизликка учраганидан кейин Парламент депутатларига коалицион ҳукумат шакллантириш учун 21 кун вақт берди.

Қуддусдаги президент қароргоҳида ўтган махсус маросимда Кнессет спикери Юлий Эдельштейнга Нетаньяху ҳам, Ганц ҳам вазирлар маҳкамасини шакллантира олмагани ва ушбу вазифа энди Кнессет депутатларига топширилишини маълум қилган.

«Бу амалдаги қонунчиликка мувофиқ бугундан бошлаб 21 кун муддат давомида Кнессет депутатлари томонидан кейинги ҳукумат таркиби шакллантирилишини англатади. Ушбу вақт Исроил давлати учун чинакам синовлар даври бўлади. 21 кун ичида сиз ўз блок ва партияларингиз вакили бўлмайсиз, виждон олдидаги сўроққа жавоб қайтарасиз, фақат битта Исроил давлати олдидаги асосий бурчим нимадан иборат деган саволга жавоб топишингиз керак», — дея депутатларга мурожаат қилган Ривлин.

Ҳукуматни шакллантириш Кнессет депутатларига топширилиши Исроил давлатчилиги тарихида ҳали умуман кузатилмаган янги ҳодиса бўлди.

Мамлакат амалдаги қонунчилигида Исроил Кнессетига сайланган депутатларга 21 кун ичида парламентдагилар кўмаги асосида ҳукумат шакллантириш имконияти берилиши кўзда тутилган. Тартибга кўра, бош вазир номзоди 120 нафар депутат ўртасида овозга қўйиш йўли билан лавозимга тасдиқланади. Парламентнинг ҳар қандай аъзоси бош вазир лавозимига даъвогарлик қилиши мумкин.

Президент депутатларга ҳукумат шакллантирилаётган вақтда сайловолди қарама-қаршиликларни унутиш ва вазифага масъулият билан ёндашишни тавсия қилди.

Кнессет ҳуқуқий маслаҳатчиси Эял Инон томонидан берилган маълумотномада 21 кун ичида парламентдаги ҳамкасбларидан 61 та тавсия олган депутатга президент Ривлин томонидан ҳукумат шакллантириш вазифаси юкланади.

Вазирлар маҳкамасини шакллантириш учун унга икки ҳафта муддат берилади. Қонунчиликка мувофиқ, ушбу йўл билан ҳукуматни шакллантирган даъвогар парламентда энг кўп овоз олса, бош вазир лавозимига тайинланади. Депутатларга ўз партиялари қарор ва топшириқларини бажариш мажбурияти юклатилган фраксион тартиб-интизом ушбу жараён пайтида вақтинчалик бекор қилинади.

Агар ушбу жараён ҳам муваффақиятсизликка учраса, Исроил тарихида бир йил ичида учинчи бор кетма-кет парламентга сайловлар ўтказилади. Экспертлар Кнессетнинг 22-чақирувига муддатидан аввал сайловлар 2020 йил март ойида ўтказилиши мумкинлигини тахмин қилмоқда.