Эронда интернетнинг блоклангани оқибатида мамлакат Telegram каналларидаги кўришлар сони кескин тушиб кетди

Эронда 15 ноябрда ҳукуматнинг бензин нархини ошириш тўғрисида чиқарган фармойишидан кейин бошланган норозилик намойишлари оқибатида мамлакат ҳудудида интернет ўчириб қўйилган. Интернетнинг ўчирилиши ва мобил алоқа сифатининг пасайиши барча соҳаларга салбий таъсир кўрсатган.

Telegram мессенжеридаги каналларда кўришлар сони ҳам кескин камайди. Жумладан, «ir.tgstat.com» маълумотларига кўра, Эрон Telegram каналларидаги кўришлар сони 9 баробарга қисқарган. Жами 35 мингта каналда 1,3 миллиардгача бўлган кўрсаткич 150 миллион бўлиб қолган.

Намойишлар бошланиши ва интернет ўчирилишидан аввал кундалик кўришлар сони 350 мингни ташкил этган бўлса, телекоммуникация хизматлари узиб қўйилганидан кейин кўрсаткич 75 мингга тушиб кетган.

Эрон ҳукумати интернет хизматларини қайта ёқиш ишларини бошлаб юборган. Алоқа мамлакатнинг жанубий қисмида жойлашган Ҳурмозгон вилоятида қайта тикланган, аҳолида Instagram ҳамда WhatsApp мессенжерларидан фойдаланиш имконияти пайдо бўлган.

Эронда аҳолининг норозилик намойишлари 16 ноябрда ҳукуматнинг бензин нархини ошириш ҳақидаги қарорни имзолагани оқибатида бошланган. Эрон полицияси намойишчиларни тарқатиш учун уларга нисбатан ўқотар қуролдан фойдаланган. Норозиликлар туфайли 16 ноябрь куни Эронда интернет ўчириб қўйилди. Вашингтон Эрон ҳукуматининг мамлакатда бошланган норозиликлар туфайли интернетни ўчириб қўйганини кескин қоралади ва намойишчилар томонида эканлигини маълум қилди. Эрон бензин нархи ошгани туфайли моддий зарар кўрган аҳолига кўрилган зарарни қоплаш учун субсидиялар ажратган. Эрон олий етакчиси Али Хоманаий мамлакатда бензин нархининг ошиши сабаб бошланган халқ норозиликларини хориждаги душманларнинг фитнаси деб атаган. Кейинчалик Эроннинг 21 та шаҳридаги норозилик намойишларида қурбон бўлганларнинг сони 106 нафарга етгани, Эрондаги норозилик намойишлари вақтида полиция қўлга туширган безорилар ўт қўйилган ҳар бир бино учун 60 АҚШ доллари миқдорида мукофотга эга бўлганини тан олгани хабар қилинди.