Тошкент шаҳар Ёнғин хавфсизлиги бошқармаси матбуот хизмати Юнусобод туманида жойлашган омборхонада юзага келган ёнғин ҳақида маълумот берди.
19 ноябрь куни соат 11:09 да Юнусобод тумани I.Аҳмад кўчаси 14-уйда жойлашган, «Smart Stroy Building» ва «Teplo Lyuks Biznes» МЧЖларга қарашли омборхона 200 квадрат метр майдонида ёнган. Ёнғиндан 1500 квадрат метр майдонидаги қурилмалар сақлаб қолинган. Ёнғин ўчириш жанговар бўлинмалари чақирилган манзилга соат 11:15 да етиб борган ва кўрилган тезкор чора ва ҳаракатлар натижасида ёнғин соат 11:49 да қуршаб олиниб, соат 12:01 да ўчирилган.
Ёнғин сабаби ва келтирилган моддий зарар миқдори аниқланмоқда. Ёнғиндан инсонларни ҳалок бўлиш ва тан жароҳати олиш ҳолатлари қайд этилмади. Ёнғин жойига 6 та ёнғин ўчириш техникалари жалб қилинган.
Шу муносабат билан Тошкент шаҳар Ёнғин хавфсизлиги бошқармаси иқтисодиёт тармоқлари ва ижтимоий соҳа объект раҳбар ҳамда ходимларини, шунингдек, фуқароларимизни ёнғин хавфсизлиги қоидаларига қатъий риоя этишларини сўраб қолади.
Изоҳ (0)