Олий Мажлис Қонунчилик палатасининг Меҳнат ва ижтимоий масалалар қўмитаси томонидан иккинчи ўқишга тайёрланаётган янги таҳрирдаги «Аҳолини иш билан таъминлаш тўғрисида»ги қонун лойиҳаси юзасидан фракциялараро мунозара ўтказилди, деб хабар беради парламент матбуот хизмати.
Фракциялараро мунозарадан кўзланган асосий мақсад меҳнат муносабатлари бўйича қонун ҳужжатларига киритилаётган институционал ўзгаришларни муҳокама қилиш ва мутахассислар, экспертлар фикрларини ҳисобга олган ҳолда, аҳоли бандлигига оид қонун лойиҳасини такомиллаштириш юзасидан якдил тўхтамга келишдан иборат бўлди.
«Аҳолини иш билан таъминлаш тўғрисида»ги Ўзбекистон қонунининг янги таҳририда «иш билан таъминлаш» тушунчасини «аҳоли бандлиги» тушунчаси билан алмаштириб, «Аҳоли бандлигини таъминлаш тўғрисида»ги Ўзбекистон қонуни лойиҳаси тартибида кўриб чиқиш таклифи инобатга олинди.
Қонун лойиҳасида аҳолининг бутун умр давомида узлуксиз таълим олиши ғоясини ишсиз аҳолига юксак миллий ва халқаро стандартлар асосида, айниқса, Бандлик ва меҳнат муносабатлари вазирлиги тизимида яратилаётган касб-ҳунар марказларида ўқитиш орқали таъминлаш ҳуқуқий жиҳатдан мустаҳкамланди. Бу ўринда ишсизлар учун стипендиялар миқдорининг иш ҳақининг энг кам миқдори базасида кескин оширилаётгани, ишсизларни касбга ўргатиш жараёнининг такомиллаштирилаётгани ва ишчи кучи сифатини сертификатлашнинг қонунчилик амалиёти жорий этилаётганини таъкидлаш зарур.
Қонун лойиҳасида ишсизларни кучли ижтимоий ҳимоя қилишнинг муҳим тадбирлари, хусусан, ишсизлик нафақаси миқдорини, аҳоли бандлигини фаоллаштириш ва унинг самарасини оширишни давлат томонидан молиялаштиришни кескин кўпайтириш назарда тутилган.
Йиғилиш якунида қўмитанинг янги таҳрирдаги мазкур қонун лойиҳасини янада такомиллаштиришга қаратилган тегишли таклиф ва тавсиялари ишлаб чиқилди.
Изоҳ (0)