Тошкент шаҳри ва республиканинг ҳар бир ҳудудида 17—18 ноябрь кунлари Миллий гвардия ҳарбий отлиқ отрядларининг «Ўзбекистон Давлат байроғи марши» бўлиб ўтди. Бу ҳақда «Дарё»га Миллий гвардия матбуот хизмати маълум қилди.
Қайд этилишича, маршлар давомида отлиқлар отряди билан бир қаторда авто ва мото бўлинмалар ҳамда велоспортчилар иштирокида байроқ баланд кўтарилган ҳолда саф юришлари ўтказилди.
Шунингдек, Жиззах давлат педогогика институти академик лицейи биносида «Байроққа садоқат — Ватанга садоқат» шиори остида лицей ўқитувчилари ҳамда Жиззах вилояти бўйича Миллий гвардия бошқармаси ҳарбий хизматчи ва ходимларидан ташкил топган жамоалар ўртасида махсус викторина ўтказилди. Жиззах вилоятининг кириб келиш дарвозасида эса ҳарбий хизматчилар ёрдамида узунлиги 90 метр, эни 60 метр бўлган давлат байроғи намойиши ташкил этилди.
Мавзуга доир: Байроқларни бир-биридан фарқлай оласизми? Географиядан неча баҳога ўқигансиз ўзи? Қани, бир тест топширинг-чи!
Навоий вилоятида Миллий гвардия бошқармаси ҳамда бўлинмалари томонидан «Ўзбекистон Республикаси Давлат байроғи — фахрим ва ғурурим» шиори остида ёшлар иштирокидаги шеърхонлик кечаси ва бадиий дастурларни ўз ичига олган маънавий-маърифий тадбирлар ўтказилди.
Мавзуга доир: Фото: Ўзбекистон байроғи Килиманжаро, Элбрус чўққиси ҳамда дунёнинг бошқа бурчакларида
Термиз шаҳрида эса «Байроғимиз — фахримиз, ғуруримиз» мавзусида ёшлар ўртасида югуриш бўйича марафон бўлиб ўтди. Шу билан бирга Миллий гвардиянинг Сурхондарё вилояти бўйича бошқармаси ва Қизириқ тумани ҳокимлиги ҳамкорлигида «Давлат байроғи — менинг ифтихорим!» шиори остида тумандаги таълим муассасалари ўқувчилари ва маҳаллалардаги вақтинча ишсиз ёшлар иштирокида спортнинг бир қатор турлари бўйича мусобақа ўтказилди.
Бўлиб ўтган беллашувлардаги барча ғолиблар ва тадбирларнинг фаол иштирокчилари Миллий гвардия бошқармалари томонидан муносиб рағбатлантирилган.
Аввалроқ Ўзбекистонда 18 ноябрь—Байроқ қабул қилинган кун муносабати билан пиёда юриш марафони ўтказилгани, Регистон майдонига 100 та байроқ ўрнатилгани, Бухорода Ёшлар маркази биноси улкан байроқ билан қоплангани ҳақида хабар берилганди.
Изоҳ (0)