Туркия Сурия шимоли-шарқидаги ҳудуд террорчилардан бутунлай тозаланмаса, у ерда янги ҳарбий операция бошлаши мумкин. Бу ҳақда Туркия ташқи ишлар вазири Мавлут Чавушўғлу маълум қилди. Вазирнинг сўзларига кўра АҚШ ва Россия «Сурия демократик кучлари» террорчиларига қарши ўтказилган операцияни тўхтатиш бўйича келишувларда белгиланган мажбуриятларни бажармаган, деб ёзмоқда «Коммерсантъ».
Чавушўғлу Вашингтон ва Москвани келишувларга амал қилишга чақирди.
«Агар керакли натижага эришилмаса, ўзимиз ишга киришамиз. Операция яна қайта бошланади»,— дея вазир сўзларидан иқтибос келтирган Reuters.
Мавзуга доир:
«Тинчлик булоғи» операцияси ҳақида
9 октябрда Анқара Сурия шимоли-шарқида Туркиядаги қочоқлар учун хавфсиз зона ташкил этиш мақсадида «Сурия демократик кучлари» курд жангарилари ва ИШИД террорчиларига қарши «Тинчлик булоғи» ҳарбий операциясини бошлаган. Дунё давлатлари туркларнинг ушбу ҳаракатларини қоралаган. АҚШ Туркияга қарши санкциялар қўллади.
17 октябрда Анқара ва Вашингтон Сурия шимоли-шарқидаги операцияни 120 соатга, курдлар хавфсиз зона ҳудудидан чиқиб кетиши учун тўхтатишни келишиб олди ва санкциялар бекор қилинди.
22 октябрда Сочида Россия президенти Владимир Путин ва Туркия давлат раҳбари Ражаб Тоййиб Эрдўғон Сурия ҳудудидаги нотинч вазиятни муҳокама қилди ва «Тинчлик булоғи» операциясини 23 октябрдан яна 150 соатга тўхтатиш ва ўт очмаслик ҳақидаги шартлашув муддати якунига етгач ҳамкорликда Туркия—Сурия чегарасида 30 километрлик ҳудудни барпо этиш учун қўшма патрул тадбирлари ўтказиш ҳақида меморандум имзолади.
1 ноябрда курдларнинг Туркия чегарасидан 30 километр узоқликка чекингани ва улар тарк этган ҳудудни Сочида имзоланган меморандумга мувофиқ Сурия қўшинлари ва Россия ҳарбий полицияси эгаллаши маълум бўлди. 5 ноябрда Туркия ҳамда Россия ҳарбийлари Сурия шимолидаги Айн-ал-Араб аҳоли пунктидаги (Кобани) иккинчи қўшма патрул тадбирларини бошлади. 10 ноябрда Туркия президенти Ражаб Тоййиб Эрдўғон ҳамда Россия президенти Владимир Путин телефон орқали суҳбат қилиб, Суриядаги низоларни ҳал этиш борасида ўзаро фикр алмашган. Россия Туркия келишувига мувофиқ икки давлат ҳарбийлари Сурия шимоли-шарқида жами 8 та қўшма патрул тадбирлари ўтказган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)