Кувайт бош вазири вазифасини бажарувчи шайх Жобир ал-Муборак ал-Ҳамад ас-Сабоҳ мамлакат амирининг янги ҳукумат тузиш бўйича таклифини рад этди. Бу ҳақда «ТАСС» хабар берди.
Бош вазир вазифасини бажарувчи давлат раҳбарига билдирилган ишонч учун миннатдорчилик изҳор этган ва янги ҳукуматни шакллантириш таклифини қабул қила олмаслигини билдирган. 14 ноябрда истеъфо берган бош вазир нима учун рад жавоби берганини изоҳламаган.
Кувайт амири Сабоҳ ал-Аҳмад ал-Жобир ас-Сабоҳ яқин фурсатларда мамлакат халқига мурожаат қилиб, ҳукумат атрофидаги гап-сўзларга ойдинлик киритиши кутилмоқда.
Аввал Кувайт амири мудофаа вазири, амирлик ички ишлар вазирини лавозимдан четлатган ва бош вазир вазифасини бажарувчига охирги ўзгаришларни инобатга олган ҳолда янги ҳукумат шакллантиришни буюрганди.14 ноябрда Кувайт амири ҳукумат истеъфосини қабул қилган ва вазирлардан янги маҳкама шакллантирилгунига қадар ўз вазифаларини бажариб туришни сўраганди. Кувайт ҳукуматининг расмий вакили вазирлар маҳкамасининг истеъфоси ижро органи фаолиятини қайта ислоҳ қилиш билан боғлиқ эканлигини билдирган.
Изоҳ (0)