Жорий йилнинг 15 ноябрь куни Тошкент шаҳар Мирзо Улуғбек тумани ТТЗ-1 мавзесидаги 8, 9, 26-уйлар атрофида ноқонуний кесилаётган дарахтлар тўғрисида Facebook’даги «Potrebitel.uz» ва «ChinovnikUZ» саҳифаларида ҳамда Telegram’даги «Insider.uz» каналида хабар берилган. Тошкент шаҳар ҳокимлиги мазкур хабарлар бўйича ҳолатни ўрганиб чиқди ва маълумот берди.
Қайд этилишича, бу ҳолат бўйича Давлат экология қўмитаси ҳамда унинг Тошкент шаҳар бошқармасига юқорида кўрсатилган ижтимой тармоқлардан тушунтириш бериш бўйича мурожаатлар келиб тушмаган.
Маълум қилинишича, ТТЗ-1 мавзесидаги 8, 9 ва 26-уйларга хизмат кўрсатувчи «Навниҳол Коммунал» МЧЖ томонидан 2019 йилнинг 27 сентябрь куни Давлат хизматлари агентлиги орқали табиий омиллар таъсирида қуриган дарахтларни кесишга рухсатнома сўраб мурожаат қилинган.
Тошкент шаҳар экология ва атроф-муҳитни муҳофаза қилиш бошқармаси инспекторлари томонидан 2019 йилнинг 27—30 сентябрь кунлари мурожаат жойига чиқиб ўрганилган. Ўрганиш натижасида 8, 9 ва 26-уйлар атрофидаги икки дона чинор, бир дона шумтол, бир дона қайрағоч дарахтлари табиий омиллар таъсирида қуриганлиги тўғрисидаги далолатнома «Навниҳол Коммунал» МЧЖ раҳбари З.Тожимуродова ва холис сифатида жалб қилинган ТТЗ-1, 5-уй, 44-хонадонда истиқомат қилувчи Э.Абдуллаева иштирокида расмийлаштирилган.
Ҳокимликнинг маълумот беришича, ушбу ҳудуддаги чинор дарахтининг қуриганлиги тўғрисида жорий йилнинг август—октябрь ойларида Тошкент шаҳрида куз-қиш мавсумига тайёргарликни ўрганиш бўйича фаолият юритган Фавқулодда вазиятлар вазирлиги ишчи гуруҳи томонидан ҳам кўрсатиб ўтилган.
Мазкур далолатнома асосида Тошкент шаҳар экология ва атроф-муҳитни муҳофаза қилиш бошқармасининг 2019 йил 30 сентябрдаги мазкур дарахтларнинг қуриганлиги сабабли кесиш тўғрисидаги 1932-сон хулосаси расмийлаштирилган ва 3 октябрь куни Давлат хизматлари агентлигига юборилган.
Жорий йилнинг 14 ноябрь куни ТТЗ-1 мавзеси 8, 9 ва 26-уйлар атрофидаги дарахтларни кесиш бўйича Мирзо Улуғбек тумани ҳокимлигининг 98-сон рухсатномаси расмийлаштирилган бўлиб, унинг амал қилиш муддати 23 ноябрга қадар белгиланган.
Тошкент шаҳар экология ва атроф-муҳитни муҳофаза қилиш бошқармаси инспекторлари томонидан жорий йил 15 ноябрь куни ушбу ҳолат маҳалла фуқаролар йиғини раҳбари, округ масъули, коммунал хизмат кўрсатувчи ташкилот раҳбари ҳамда ушбу ҳудуддаги аҳоли вакиллари иштирокида ўрганилган ҳамда улар томонидан ушбу дарахтни ҳақиқатда кесиш лозимлиги яна бир бор таъкидланган.
Хабар берилишича, ҳозирги вақтда ТТЗ-1 мавзеси 8-уйнинг орқа томонидаги чинор дарахти тагидан кесилмаган бўлиб, фақатгина тепа қисми ва шохлари олиб ташланган.
Ҳокимлик хабарида таъкидланишича, Ўзбекистон Президентининг 2019 йил 30 октябрдаги «2030 йилгача бўлган даврда Ўзбекистон Республикасининг атроф муҳитни муҳофаза қилиш концепциясини тасдиқлаш тўғрисида»ги фармонига асосан, 2019 йилнинг 1 ноябридан 2020 йилнинг 31 декабрига қадар давлат ўрмон фондига кирмайдиган дарахтлар ва буталар қимматбаҳо навларининг кесилишига мораторий жорий этилган. Ушбу даврда давлат ўрмон фондига кирмайдиган дарахтлар ва буталар қимматбаҳо навларининг кесилишига рухсатнома бериш ман этилган.
Бу меъёр табиий омиллар ёки зараркунандалар, ўсимликлар касалликлари таъсирида зарарланган, қуриб бораётган ёки қуриб қолган, шунингдек, фуқароларнинг ҳаёти ва соғлиғига, юридик ва жисмоний шахсларнинг мол-мулкига хавф туғдирувчи дарахтлар ва буталарни санитар кесиш ва қирқишга жорий этилмаслиги белгилаб қўйилган.
Изоҳ (0)