Давлат тест маркази вакиллари томонидан маълум қилинишича, абитуриентларни битирув давлат аттестацияси сертификати, яъни ўрта ва ўрта-махсус таълим муассасаларини битириш чоғида топшириладиган якуний давлат имтиҳонлари натижалари асосида ўқишга қабул қилиш масаласи айни пайтда ўрганиб чиқилмоқда. Тегишли вазирлик ва идоралар бу масала бўйича бир фикрга келгач, тегишли қарор қабул қилинади. Бу ҳақда «Севимли» телеканалининг «Замон» ахборот дастурида хабар берилди.
2020—2021-ўқув йилидан абитуриентлар олий ўқув юртларига кириш учун бешта фандан имтиҳон топширади. Саволлар мажмуасининг биринчи бўлимига барча тест топширувчилар учун мажбурий бўлган учта фан — она тили, математика ва Ўзбекистон тарихи киритилади. Иккинчи қисмига эса танланган мутахассислик бўйича иккита фан киритилади.
Давлат тест маркази вакиллари томонидан таъкидланишича, саволлар мажмуасининг мажбурий фанлар қисмидаги саволлар мактаб дастури асосида тузилиб, уларнинг мураккаблик даражаси танланган мутахассислик фанлари бўйича бериладиган саволлар даражасидан пастроқ бўлади.
Киритилган янгиликларга абитуриентларнинг муносабати ўрганилганда, улар фанларнинг кўпайиши имтиҳонларга тайёрланиш жараёнини мураккабкаштиришини билдирмоқда. Бунда асосий муаммо сифатида бешта фанга тайёрланиш учун вақтнинг етишмаслиги кўрсатилмоқда.
ДТМ томонидан 22, 24 ва 30 октябрь кунлари мажбурий фанлар бўйича аппробация ўтказилган ва айни пайтда натижалар таҳлил қилинмоқда.
Изоҳ (0)