Беларусь республикаси Иккинчи жаҳон уруши давлат музейи ходимлари Тошкентга ташриф буюрди. Ташриф давомида меҳмонлар учун Қуролли Кучлар давлат музейида семинар учрашув бўлиб ўтди. Бу ҳақда Мудофаа вазирлиги ахборот ва оммавий коммуникациялар департаменти «Дарё»га маълум қилди.
Мазкур учрашув Олмазор туманидаги генерал Собир Раҳимов ҳайкали ўрнатилган хиёбонда Иккинчи жаҳон урушидаги ғалабанинг 75 йиллигига бағишлаб бошланган «Ғалаба боғи»ни барпо этиш бўйича олиб борилаётган ишлар тўғрисида фикр алмашиш мақсадида ўтказилди.
Эслатиб ўтамиз, Президент Шавкат Мирзиёев жорий йилнинг 25 июнь куни мазкур ҳудудда бўлиб, «Ғалаба боғи» қурилиши бўйича топшириқлар берган эди. Ушбу топшириқ асосида боғ концепцияси ишлаб чиқилган.
Концепцияни ишлаб чиқишда Вазирлар Маҳкамаси, Мудофаа, Ташқи ишлар, Ички ишлар, Маданият вазирликлари, Давлат хавфсизлик хизмати, Республика Маънавият ва маърифат маркази, Ўзбекистон фанлар академияси, Президент ҳузуридаги Давлат бошқаруви академияси ва Ўзбекистон Бадиий академиясининг таклиф ва тавсияларидан ҳам фойдаланилди.
«Ғалаба боғи»нинг концепцияси билан яқиндан танишиш жараёнида беларуслик мутахассисларга шу кунга қадар қилинган ишлар, шунингдек, амалга оширилиши режалаштирилган қурилишлар бўйича ҳам батафсил маълумот берилди. Ўз навбатида улар ҳам боғнинг барчага бирдек қулайлик яратиши учун ўз таклиф ва мулоҳазалари билан бўлишди.
Таъкидлаш керакки, боғ ҳудуди «Шон-шараф» музейи ҳам бунёд этилмоқда. У ердан Иккинчи жаҳон урушида жасорат кўрсатган ўзбекистонликлар ҳақидаги маълумотлар (видео, газета, суратлар ва ҳ.к) ўрин олади.
Қурилиш вазирлиги ходими Гулшоира Магаметованинг таъкидлашича, боғнинг турли бурчаклари миллий анъаналаримизга мос айвонлар ҳамда интерактив маълумотлар улашувчи замонавий электрон қурилмалар билан жиҳозланади. Шунингдек, Иккинчи жаҳон урушида ғалабага эришган 35 давлатнинг байроқ, герб ва хариталаридан иборат махсус майдончалар ҳам барпо этилади.Тарихий муҳитни яратиш мақсадида ҳарбий мусиқалар жаранглаб, уруш даврига оид маълумотлар янграб туради.
Изоҳ (0)