Марокаш махсус хизмати ходимлари 17 ноябрда пойтахт Работ шаҳрида терактлар амалга оширишни режалаштирган икки нафар ИШИД террорчисини қўлга туширди, дея хабар берди «ТАСС».
«Экстремизм элементлари ва террорчилик ҳаракатларини режалаштирган икки нафар 30 ва 34 ёшда бўлган жиноятчи ҳибсга олинди», — дейилади махсус кучларнинг ахборотида.
Тергов натижаларига кўра қўлга олинган икки террорчи ИШИД мафкурасини тарғибот қилиш ва жангариларни Марокаш ҳудудида терактлар амалга оширишга тайёрлаш ишлари билан шуғулланган. Махсус хизмат мутахассислари тинтув вақтида гумонланувчиларнинг уйидан турли электрон аппаратлар ва совуқ қуроллар топган.
Ушбу операция Сурия ҳамда Ироқ ҳудудида ИШИД ҳали бутунлай мағлуб этилмагани ва бошқа мамлакатларда ўз таъсирига эга эканлигини билдиради, дейилган Марокаш хавфсизлик кучлари баёнотида.
ИШИД вакилларини қўлга олиш операцияси Суд терговлари марказий бюросининг вакиллари иштирокида амалга оширилган. Марокашдаги ушбу бюро 2015 йил март ойида ташкил этилган бўлиб, турли жиноятлар ва террорчилик таҳдидларига қарши курашади.
Бюро қиролликдаги асосий махсус хизматлардан бири бўлган миллий ҳудуд назорати бош бошқармасига бўйсунади. Экстремистлар ва террорчиларнинг таҳдидларига қарши кураш ушбу бошқарманинг асосий вазифаси ҳисобланади.
Аввал Малида чегара постига уюштирилган ҳужум натижасида 50 нафардан ортиқ одамнинг ҳалок бўлгани ва ИШИД террорчилари ушбу ҳужум учун масъулиятни ўз зиммасига олгани, Буркина Фасода олтин кони ишчиларига қилинган ҳужум оқибатида 37 нафар одам ҳалок бўлгани ҳамда Нигерияда «Боко Харам» жангарилари ҳужуми сабаб 10 нафар ҳарбийнинг ўлдирилгани хабар қилинган.
Изоҳ (0)