16 ноябрь куни Тошҳовуз вилоятининг фуқаролари Туркманистондан Ўзбекистонга ўтадиган Шовот божхона постида туркманистонлик полициячилар ҳамда божхона ходимлари ўртасида жанжал келиб чиққан. Низони бартараф қилиш ишларини Туркманистон хавфсизлик вазирлиги ходимларининг чекига тушган, деб ёзмоқда «Хроника Туркменистана».
Туркманистон чегара ҳудудида Ўзбекистонга ўтиш учун юзлаб фуқаролар навбатда туради. Навбатдан олдин қўшни давлат ҳудудига ўтиб олмоқчи бўлган одамлар эса ўзлари танийдиган полициячиларга пора бериб навбатни айланиб ўтишга уринади.
Шундай ҳолатларнинг бирида аввалига навбатда турган оломон ўртасида низо келиб чиққан, кейинчалик полициячилар ва божхона ходимлари ҳам муштлаша бошлаган. 68 нафар полициячи божхона ходимларининг ниҳоятда секин ишлаганлиги учун танқид қилган, улар эса бунга жавобан миршаблар жамоат тартибини сақлаши кераклигини билдирган.Оқибатда ўртада жанжал келиб чиққан. Командирлар низони ҳал эта олмагач, миллий хавфсизлик вазирлиги ходими ўз ҳамкасбларини ёрдамга чақирган. Улар етиб келганидан кейин жанжалга барҳам берилган.
Мавзуга доир:
Шовот пости ҳар доим гавжум бўлган. Фуқаролар Ўзбекистондаги қариндошларини кўришга, турли маҳсулотлар сотиш ва сотиб олиб кичик бизнес билан шуғулланиш учун чегарадан ўтади.
Сентябрь, октябрь ойларида Тошҳовуз вилояти фуқаролари Ўзбекистонга пахта териш учун ўтган. «Хроника Туркменистана» нашрининг қайд этишича, пахтакорларга бир килограмм пахта учун уч манатдан пул тўланган. Нашр Ўзбекистоннинг ушбу ҳудудида теримчиларга яхши тўланиши, шу сабабли ҳам туркманларнинг бу ерга ўтганлиги ҳақида ёзган.
Изоҳ (0)