Самарқандда муқаддам фирибгарлик жинояти учун судланиб, етказилган зарар қопланганлиги сабаб ахлоқ тузатиш ишларига ҳукм қилинган шахс рашк оқибатида ўта шафқатсизлик ва безорилик оқибатида қасддан одам ўлдиргани учун 19 йил муддатга озодликдан маҳрум этилди. Бу ҳақида «Дарё» мухбири Фарҳод Норбўтаев хабар бермоқда.
Маълум бўлишича, 2019 йилнинг 7 август куни Д.Д. исмли шахс соат тахминан 14:30 атрофида Самарқанд вилоятининг «Деҳқон бозор»ларидан бирида турмуш ўртоғи Б.Б.ни учратиб, безорилик оқибатида жамиятда юриш-туриш қоидаларини қасддан менсимаган ҳолда уни қасддан ўлдиришни мақсад қилган. У савдо растасига сотиш учун қўйилган ошхона пичоғи билан қуролланиб, аёлнинг чап кўкрак қафаси орқа соҳасига икки маротаба зарб билан урган.
Аёл ундан қутулиш мақсадида «Деҳқон бозор» ҳудудидаги дорихонага қочиб борган. Аммо Д.Д. жиноий мақсадини охирига етказиш мақсадида уни орқасидан таъқиб қилиб бориб, қўлидаги ошхона пичоғи ёрдамида ўта шафқатсизлик билан унга 9 маротаба зарба берган. Натижада олган тан жароҳатлари сабаб Б.Б. воқеа жойида вафот этган.Жиноят ишлари бўйича Самарқанд вилоят суди судланувчи Д.Д.ни Жиноят Кодексининг 97-моддаси 2-қисми «ж, л» бандларида назарда тутилган (Безорилик оқибатида ўта шафқатсизлик билан қасддан одам ўлдириш) жиноятни содир этганликда айбли деб топиб, 18 йил 10 ой муддатга озодликдан маҳрум қилиш жазоси белгиланган.
Жиноят ишлари бўйича Самарқанд вилоят суди судьяси Тўлқин Қодировнинг маълум қилишича, судланувчи Д.Д.га Жиноят Кодексининг 60, 61-моддаларига асосан тайинланган жазога 2019 йил 10 майдаги ҳукм билан тайинланган ахлоқ тузатиш ишлари жазосининг ўталмаган қисмини қисман қўшишлик йўли билан узил-кесил 19 йил муддатга озодликдан маҳрум қилиш жазоси тайинланган.
Изоҳ (0)