Тошкент шаҳрида барпо этилаётган Болалар миллий тиббиёт марказида қурилиш ишлари якунланиш арафасида. Ҳозирда ушбу замонавий муассасани юқори технологик тиббиёт ускуналари билан таъминлаш ишлари бошлаб юборилган. Мазкур лойиҳанинг умумий қиймати 130,58 миллион долларига тенг. Бу ҳақда Соғлиқни сақлаш вазирлиги маълум қилди.
Хабар берилишича, аввалроқ 30 нафар ҳамшира бир ойлик ўқув курсини якунлаб қайтган. Куни кеча 19 нафар шифокор бир йиллик ўқув курсини тугатиб, Ўзбекистонга қайтиб келди. Жорий йил 17 ноябрдан эса яна 20 нафар шифокор Пусан миллий университети клиникасида малака оширишни бошлайди ва бир йил давомида ўқийди.
Соғлиқни сақлаш вазирлигида малака ошириб келган ва малака оширишга юборилаётган шифокорлар билан учрашув ўтказилди.
Қайд этилишича, мазкур тиббиёт марказида ишлаш учун танлаб олинган тиббиёт ходимларининг Жабубий Кореяда малака оширишини ташкил қилиш келгусида халқаро стандартларга мос равишда болаларга ихтисослашган тиббий хизмат кўрсатиш имконини яратади.
Малака ошириш учун юборилган гуруҳ таркибида тиббиётнинг хирургия, неврология, онко-гематология, урология, травматология-ортопедия, гастроэнтерология, неонатология каби ўнлаб йўналиш мутахассислари ўз соҳалари бўйича ташхислаш, даволашнинг замонавий ва инновацион усуллари, уларни қўллашда юқори технологик ускуналардан фойдаланиш борасида билим ва кўникмаларини ошириб қайтди.
Шунингдек, мулоқотда Болалар миллий тиббиёт маркази учун келтирилаётган юқори технологик тиббий ускуналарни бир маромда ишлашини таъминлашга масъул 20 нафар техник ходимнинг ҳам малакасини ошириш кўзда тутилгани қайд этилди.
Янги марказ 280 ўринга эга бўлиб, унда кунига 250 нафар беморни қабул қилиш ва биринчи йилида 1500 дан зиёд юқори технологияга асосланган операция ўтказиш кўзда тутилган. Ушбу замонавий шифохонада 1000 нафарга яқин малакали шифокор ва ўрта тиббиёт ходими фаолият юритиши режалаштирилган.
Изоҳ (0)