2018 йил давомида Сурхондарёга Афғонистондан 700—800 киши келган бўлса, жорий йилда уларнинг сони тўрт мингдан ортиб кетди, деб хабар беради ЎзА.
Сурхондарё сайёҳлик борасида бой тажрибага эга Самарқанд, Бухоро, Хива каби шаҳарлар сафига қўшилмоқда. Вилоятда кўплаб тарихий обидалар мавжуд бўлиб, улар энди таъмирланиб, сайёҳлар эътиборига ҳавола этилмоқда. Ҳаким ат-Термизий, Исо ат-Термизий, Султон ота, Қирқ қиз кабилардан ташқари буддизм билан боғлиқ ўндан зиёд обидалар мавжуд. Денов, Термиз, Шўрчи ва Музробод туманларида улар кўпроқ учрайди.
Таъкидланишича, Фаёзтепа, Кампиртепа, Далварзинтепа, Қоратепа кабиларни кўриш учун Япония, Хитой ва Малайзиядан ҳар йили жуда кўп одамлар келмоқда.
«Бизда туризмни бошқа турлари қатори таништирув туризми ҳам ривожланмоқда. Бу йўналишда АҚШ, Германия, Франциядан кўп келишади. Энг кўпи эса Афғонистондан келади. Уларга виза бериб улгурмаймиз. Чунки юртимиз кўпгина давлатлар учун очиқ бўлгани боис Афғонистондан келиш ҳам жуда осон. Ўтган йили 700—800 киши келган бўлса, бу йил тўрт мингдан ортиқ қабул қилинди. Афғонларга, энг аввало, юртимиздаги тинчлик, осойишталик қизиқ. Улар хотиржамлик излаб келади. Меҳмонхоналарга жойлашиб, тарихий обидаларни кўради ва боғларда сайр қилиб беш, ўн кун қолиб кетади», — дейди Сурхондарё вилояти Туризм бошқармаси вакили Шуҳрат Иброҳимов.
Эслатиб ўтамиз, Тошкент вилоятига жорий йилнинг тўққиз ойи давомида уч миллиондан ортиқ турист ташриф буюрган.
Изоҳ (0)