Сенат Қашқадарёда 5 нафар эркак 26 ёшли аёлни зўрлагани воқеасига муносабат билдирди

Олий Мажлис Сенати номуси топталган қашқадарёлик аёл масаласи назоратда эканини билдирди. Бу ҳақда Сенат матбуот хизмати хабар берди.

Хабарда айтилишича, кўнгилсиз воқеага учраган бу аёлнинг тунда кўчада юргани ёки ахлоқий юриш-туриши мазкур мудҳиш жиноят содир этилишига асосий сабаблардан бири сифатида кўрсатилмоқда.

Олий Мажлис Сенатининг Хотин-қизлар ва гендер тенглик масалалари қўмитаси бу ҳолатни фақат ана шу омил билан боғлаш нотўғри эканлигини таъкидлаган. Шунингдек, Ўзбекистон Конституцияси ва қонунларида ҳар бир фуқаро хоҳ тун, хоҳ кундуз бўлсин кўчада юриши тақиқланмагани, ҳеч ким бировнинг ахлоқсизлигини рўкач қилиб, уни ўзбошимча жазолашга ҳаққи йўқлиги айтилган.

Шунингдек, қайд этилишича, аёл ўз оиласини боқиш истагида умумий овқатланиш жойларидан бирида официант бўлиб ишлаган ва уйига қайтаётган вақтда айрим нияти бузуқ шахслар томонидан таҳқирланган. Шунинг учун масалага бундай тор маънода ёндашиш юртимизда тунда юриш зўравонлик қурбони бўлишга сабаб бўлади деган мутлақо нотўғри қарашларнинг шаклланишига, натижада мамлакатимизда ўрнатилган қонун устуворлиги ҳақида янглиш фикр пайдо бўлишига олиб келади.

«Хулоса битта – аёл кишининг эркинлигига тажовуз қилинган ва жиноят содир этган шахслар қонун олдида жавоб бериши муқаррар», — деб таъкидланган хабарда.

Ўзбекистон Республикасининг гендер тенгликни таъминлаш масалалари бўйича комиссияси ва Олий Мажлис Сенати Хотин-қизлар ва гендер тенглик масалалари қўмитаси ушбу жиноят иши юзасидан мутасадди идоралар томонидан зарур чоралар кўрилишини кузатиб бориши айтилган.

Эслатиб ўтамиз, Қарши шаҳрида яшовчи 30 ёшдан ошган 5 нафар эркак октябрь ойида, тунги соат 01:30 да кўчада кетаётган 26 ёшли аёлни мажбурлаб машинага ўткизиб, овлоқ жойга олиб бориб номусига тегган. Воқеа юзасидан жиноий иш қўзғатилган.