Кореялик кредитор Россия судидан «Ўзавтосаноат»ни жавобгарликка тортишни сўради

Жанубий Кореяга тегишли Erae CS Co компаниясининг Россиядаги шўбаси автомобиллар дистрибютори — «УзДЕУавто-Воронеж» компаниясининг банкротлиги бўйича ишда қарздорни назорат қилувчиларни, хусусан, «Ўзавтосаноат»ни жавобгарликка тортишни талаб қилмоқда. Бу ҳақда «Прайм» Воронеж вилояти ҳакамлик суди материалларига асосланиб хабар берди.

Ҳозирги вақтда субсидиар жавобгарлик ҳажми 22 миллиард рублга баҳоланмоқда. Корея компаниясининг шўбаси олдидаги қарз 2015 йил 3 декабрдаги дилерлик шартномаси бўйича пайдо бўлган, унга кўра у дистрибюторга 10 миллион доллар ўтказган, аммо ҳеч қандай машина олмаган.

Талаблар «Ўзавтосаноат», Автосаноат Инвест, GM Uzbekistan АЖ, шунингдек, 2013 йилдан 2017 йилгача қарздорнинг бош директори лавозимини эгаллаган уч шахс — Юрий Кан, Хасанбек Музаффаров, Игор Давидовга қўйилмоқда. Бошқа кредиторлар ҳам уларни субсидиар жавобгарликка тортиш тўғрисида ариза берди.

2017 йил апрель ойида Воронеж вилояти арбитраж суди «УзДЕУавто-Воронеж»ни банкрот деб топди. GM Узбекистан томонидан ишлаб чиқарилган Daewоо ва Ravon автомобилларини Россияга улгуржи етказиб бериш билан шуғулланган ушбу компаниянинг ягона акциядори — «Ўзавтосаноат»га тегишли бўлган Автосаноат Инвест.

Кредиторларнинг, шу жумладан, Erae CS Co шўбасининг фикрига кўра, қарздор билан бир гуруҳга кирувчи жавобгарларнинг хатти-ҳаракатлари аввалига «УзДЕУавто—Воронеж»нинг банкротлигига олиб келган, кейин эса банкротлик тўғрисидаги ишда мустақил кредиторларнинг манфаатларига зарар етказувчи «дўстона» қарздорликка олиб келди. Шу тариқа, «УзДЕУавто—Воронеж» реестрига киритилган GM Узбекистан олдидаги қарз 9,5 миллиард рублдан ошади (реестрнинг қарийб 40 фоизи).

Воронеж суди қарздорни назорат қилувчи шахсларни субсидиар жавобгарликка тортиш тўғрисидаги аризани кўриб чиқишни 2020 йил 13 апрелга тайинлади.

2008 йил март ойида General Motors (ўшанда 25 фоиз улушда) ва «Ўзавтосаноат» (ўшанда — 75 фоиз) «УзДЕУавто» базасида GM Uzbekistan қўшма корхонасини ташкил этиш жараёнини якунлади. 2017 йил октябрь ойида GM Uzbekistan ҚК акциядорлари таркибидан босқичма-босқич чиқиш ҳақида қарор қабул қилди. 2018 йил декабрь ойида давлат компанияси қўшма корхонадаги GM улушини тўлиқ сотиб олди, кейинчалик ном UzAuto Motors’га ўзгартирилди.