Брюссел шаҳрида бўлиб турган Ўзбекистон Ташқи ишлар вазири Абдулазиз Комилов 11 ноябрь куни «Афғон аёлларининг иқтисодий ҳуқуқлари ва имкониятларини Қозоғистон ва Ўзбекистонда ўқиш ва тайёрлаш орқали қўллаб-қувватлаш» дастурининг очилиш маросимида иштирок этди. Бу ҳақда ТИВ матбуот хизмати хабар берди.
Маросимда нутқ сўзлаган Абдулазиз Комилов Европа Иттифоқининг афғон аёлларини қишлоқ хўжалиги, амалий фанлар ва тоғ-кон саноатига ўқитиш дастури уларни мамлакатнинг ижтимоий ва сиёсий ҳаётига жалб қилиш учун ажойиб имконият яратишини таъкидлаган.
«Шу муносабат билан Ўзбекистон ТИВ раҳбари ушбу соҳадаги қатор Европа Иттифоқи лойиҳалари, жумладан, Термиз шаҳридаги таълим марказида афғон талабаларини, шу жумладан, аёлларни ўқитиш бўйича ЕИ—Ўзбекистон—Афғонистон уч томонлама шаклдаги ҳамкорлик истиқболларини қайд этди. Бу эса Афғонистон учун юқори малакали мутахассислар базасини яратиш жараёнига сезиларли ҳисса қўшади», — дейилади хабарда.
Эслатиб ўтамиз, Европа Иттифоқи афғон аёлларига Ўзбекистон ва Қозоғистон университетларида ўқиш имконини берувчи лойиҳага 2 миллион евро грант ажратган эди. Унга кўра, Қозоғистон ва Ўзбекистон ўқув юртларида 2025 йилгача қишлоқ хўжалиги, амалий статистика ва тоғ-кончилик соҳасидаги бакалавр, магистратура ҳамда қишлоқ хўжалиги бўйича техник мутахассислик йўналишлари бўйича 50 нафар талаба таълим олади.
Бундан аввал Абдулазиз Комилов Брусселда Европа Иттифоқига раислик қилаётган Финландия Ташқи ишлар вазири билан учрашгани, Европа Иттифоқи вице-президенти билан инсон ҳуқуқларига оид масалаларни муҳокама қилгани ҳақида хабар берилган эди.
Изоҳ (0)