ХДП ва ЎзЛиДеП «Лукойл» амалдорининг ишчиларни ҳақорат қилгани акс этган видеога муносабат билдирди

Ўзбекистоннинг Халқ демократик партияси «Лукойл» компанияси амалдори Қашқадарё вилояти, Деҳқонобод туман, Жарқудуқ газ тайёрлаш мажмуаси ишчиларини ҳақорат қилгани акс этган видеодаги ҳолатга ўз муносабатини билдирди.

«Лукойл Узбекистан Оперейтинг Компани» МЧЖ раҳбар ходими томонидан Қашқадарё вилоятида жойлашган Жарқудуқ мажмуаси ишчилари шаънига номақбул сўзлар айтгани акс этган видеолавҳа кенг жамоатчилик томонидан муҳокама қилинаётгани бежиз эмас. Ҳеч нарса инсон ҳуқуқи, қадр-қиммати ва шаънидан устун қўйилмаслиги керак.

«Лукойл Узбекистан Оперейтинг Компани» МЧЖ маъмурияти кенг муҳокамаларга сабаб бўлаётган видеолавҳа юзасидан тегишли тартибда ўрганиш ўтказиб, ҳолат бўйича расмий изоҳ, тушунтириш бериши зарур.

Ваколатли идоралар ходимларнинг қонун билан кафолатланган ҳуқуқ ва манфаатларини ҳимоя қилиш бўйича зарур чораларни кўриши, кенг жамоатчилик бу ҳақда хабардор этилиши лозим.

Халқ демократик партияси Марказий кенгаши матбуот хизмати

Биз мазкур вазиятдан келиб чиқиб, хизмат вазифасини бажариш давомида йўл қўйилган хато ва камчиликлар учун масъул ходимларга нисбатан қонунчиликда белгиланган тартибда жазо чораларини кўриш энг тўғри йўл деб ҳисоблаймиз. У ким бўлишидан қатъи назар турли миллат ва элат вакилларининг ўзига хос миллий анъаналари, урф-одатлари ҳамда шахсиятини топташга асло йўл қўйиб бўлмайди. Зеро, мамлакатимизда миллатлараро тотувлик, халқлар ўртасидаги дўстлик муносабатлари жуда яхши ривожланган.

ЎзЛиДеП компания раҳбариятидан инсон шаънига нисбатан қилинган бундай тажовуз иштирокчисига нисбатан кўрилган чора юзасидан яқин вақт давомида жамоатчиликка ахборот бериш лозим деб ҳисоблайди. Зеро, шахс қадр-қиммати, унинг шаъни дахлсизлиги Ўзбекистон қонунчилиги ҳамда халқаро нормаларга мувофиқ олий қадрият ҳисобланади.

ЎзЛиДеП матбуот хизмати